ICIPANDE ICIKALAMBA
Bushe Lesa Amona Shani Ukulwa Inkondo?
Bushe kuti mwayasuka shani icipusho cili pa muulu? Abantu abengi bamona kwati Lesa alasuminisha inkondo. Batila, Baibolo yalilanda ukuti Lesa alyebele ababomfi bakwe aba ku kale ukulwa inkondo. Na lyo line, abantu bambi batila, Yesu, Umwana wa kwa Lesa, asambilishe abasambi bakwe ukutemwa abalwani babo. (Mateo 5:43, 44) Ici e calenga balelanda ukuti akale, Lesa alisuminishe inkondo, lelo pali ino nshita, alikaanya.
Inga imwe finshi mwaishibapo? Bushe mumona ukuti Lesa alasuminisha ukulwa inkondo? Nga ca kuti alasuminisha, ninshi ni bani afwaya ukuti balecimfya? Ukwishiba ifyo Lesa amona ukulwa inkondo, kuti kwalenga mwatemwa inkondo nelyo mwaipata. Ku ca kumwenako, nga mwaishiba ukuti Lesa alisuminisha inkondo kabili aleyafwa abantu abo na imwe mulefwaya ukuti bacimfye, kuti mwatemwa pantu ninshi namushininkisha ukuti abo mutemenwe e balacimfya. Na lyo line, kuti mwaumfwa shani nga ca kuti mwaishiba ukuti abo Lesa alefwaya ukuti bacimfye ni balya abo imwe mushilefwaya? Nalimo teti mutwalilile ukuba ku lubali lwa balya mwacilafwaya ukuti bacimfye.
Nga mwaishiba ifyo Lesa amona ukulwa inkondo, kuti calenga mwatemwa Lesa nelyo mwamupata. Nga mwalimonapo ifyo abantu bacula pa mulandu wa nkondo, nalimo kuti mwatemwa ukwishiba icasuko kuli ici icipusho: Bushe Lesa alatemwa ukumona abalelwa inkondo nelyo bushe alatemwa nga amona abantu balecula pa mulandu wa nkondo nga fintu abantu bamo batontonkanya?
Nga mwaishiba ifyo Baibolo ilanda, mukasanga ukuti ifyo ilanda fyalipusana ne fyo abantu bamo batontonkanya. Na kuba, ukufuma fye na kale, Lesa tabala atemwapo inkondo. Natulande pa fyo Baibolo ilanda pa fyo Lesa alemona ukulwa inkondo ku kale sana e lyo ne fyo alemona inkondo ilyo Yesu aali pa calo. Ukwishiba ifi kwalalenga twishibe bwino ifyo Lesa amona ukulwa inkondo e lyo no kwishiba nga ca kuti ikapwa ku nshita ya ku ntanshi.