AMASUKO KU MEPUSHO YA MU BAIBOLO
Bushe abafwa bakabuuka?
Kabumba akabuusha abafwa
Yehova Lesa e Ntulo ya mweo. (Amalumbo 36:9) Kanshi kuti twashininkisha ukuti Lesa akabuusha abafwa nga fintu Baibolo ilanda. (Belengeni Imilimo 24:15) Nomba cinshi Lesa akabuushisha abafwa?
Ukutula fye na pa kutendeka, Kabumba wesu alefwaya abantu baleikala umuyayaya pano calo. (Ukutendeka 1:31; 2:15-17) Na pali ino ine nshita, Lesa afwaya ukuti abantu baleikala umuyayaya. Lesa tatemwa nga amona ifyabipa filetucitikila kabili tatemwa no kumona abantu nga balefwa.—Belengeni Yobo 14:1, 14, 15.
Bushe abakabuuka bakekala kwi?
Bushe ilyo Lesa abuumbile abantu alefwaya baleikala ku muulu? Awe. Alefwaya abantu baleikala pano calo, lelo abuumbile bamalaika ukuti e bo baleikala ku muulu. (Ukutendeka 1:28; Yobo 38:4, 7) Nomba tontonkanyeni pa bantu abo Yesu abuushishe. Abantu abo Yesu abuushishe babuukiile pano pene pa calo. Kanshi na bantu abengi abakabuuka ku nshita ya ku ntanshi, bakabuukila pano pene pa calo.—Belengeni Yohane 5:28, 29; 11:44.
Na lyo line, Lesa alisala abantu abanono abakabuukila ku muulu, uko bakaba ne mibili ya mupashi. (Luka 12:32; 1 Abena Korinti 15:49, 50) Aba abakabuukila ku muulu bakaba ishamfumu na Kristu kabili bakalateka abantu abakaba pano calo.—Belengeni Ukusokolola 5:9, 10.