Ifyo Icimonwa ca Baume Bane Abanina Pali Bakabalwe Camukuma

Bakabalwe 4 aba maka e lyo na banininepo balebutukisha, kabili nga mulebelenga pali ubu ubusesemo kuti mwamona kwati balafuma mu Baibolo mutendeke no kubamona. Kabalwe wabuuta eutangile kabili uunininepo ni mfumu iipya kabili iya bukata. Uumukonkelepo ni kabalwe uwakashika kabili uwikelepo alefumya umutende pe sonde ponse. Lyena kabalwe uwafiita fititi e ukonkelepo, no wikelepo ali na sekelo kabili kwaumfwika ishiwi ilileti, mu calo mwalaba icipowe. Kabalwe uwalenga 4 alemoneka uwabutulukila no kulwalilila, kabili alelangilila ukuti kuli no kuba amalwele ne fintu fimbi ifyakulalenga abantu balefwa, e lyo uunininepo ni Mfwa. Inshiishi ilemukonka pa numa kabili ileipaya abantu abengi icine cine.—Ukusokolola 6:1-8.

“Umuku wa kubalilapo nabelengele pa baume 4 abanina pali bakabalwe, nalyumfwile sana umwenso. Nalemona kwati Ubushiku bwa Bupingushi bwalaisa apo pene fye, kabili apo nshaipekenye, nalemona kwati nshapusuke.”—E fyalandile ba Crystal.

“Nalitemenwe sana ifyo nabelengele pa baume 4 abanina pali bakabalwe bamalangi yalekanalekana. Nalitemenwe ukwishiba umo cilya icimonwa calola.”—E fyalandile ba Ed.

Bushe na imwe nga mwabelenga pali ici icimonwa icaba mwi buuku lya Ukusokolola, mumfwa nge fyaumfwile ba Crystal nelyo mumfwa nge fyaumfwile ba Ed? Ici icimonwa caba pa fimonwa fyaishibikwa sana mwi buuku lya kulekeleshako muli Baibolo ilyo beta ukuti Ukusokolola. Bushe mwalishiba ukutila kuti mwanonkelamo nga mwaishiba umwalola ici icimonwa? Kuti mwanonkelamo shani? Lesa alilaya ukutila kuti mwaba ne nsansa nga mulebelenga, mulesambilila e lyo no kucita ifyaba muli ili ibuuku lya busesemo.—Ukusokolola 1:1-3.

Nangu ca kuti bamo balatiina nga babelenga pa cimonwa ca banina pali bakabalwe, ici icimonwa tabacilembela ukuti ciletiinya abantu. Na kuba, abengi balimona ukuti ici icimonwa cilakosha icitetekelo cabo kabili cilalenga baishiba ukuti ku ntanshi ifintu fikawama. Na imwe bene kuti mwalaumfwa ifi fine aba bantu bomfwa. Belengeni icipande cikonkelepo.