Ilyo Ubufumu bwa kwa Lesa bukalateka, abantu “bakasekelela nga nshi pantu umutende ukafula.”—Amalumbo 37:11
Cinshi Baibolo Isambilisha?
Bushe Baibolo kuti yamwafwa ukucefyako amasakamika?
Bushe kuti mwatila?
Ee
Awe
Nalimo
Ifyo Baibolo ilanda
“Mulepoosa amasakamika yenu yonse pali [Lesa], pantu asakamana imwe.” (1 Petro 5:7) Baibolo ilalenga twashininkisha ukuti Lesa kuti atwafwa ukucefyako amasakamika.
Finshi fimbi ifyo tusambililako ku fyo Baibolo ilanda?
Ipepo kuti lyalenga mwaba no “mutende wa kwa Lesa” uulenga twilasakamikwa sana.—Abena Filipi 4:6, 7.
Na kabili ukubelenga Icebo ca kwa Lesa kuti kwamwafwa ukukanalasakamikwa sana.—Mateo 11:28-30.
Bushe ukusakamikwa kukatala akupwa?
Abantu bamo basumina . . . ukuti tabakatale abaleka ukusakamikwa no kuba no bulanda, e lyo bambi bamona kwati ukusakamikwa kuti kwapwa fye nga ca kuti umuntu aya ku muulu. Muletipo shani?
Ifyo Baibolo ilanda
Lesa akafumyapo ifilenga tulesakamikwa. “Imfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:4.
Finshi fimbi ifyo tusambililako ku fyo Baibolo ilanda?
Ilyo Ubufumu bwa kwa Lesa bukalateka, abantu bakekala mu mutende.—Esaya 32:18.
Tatwakaleibukisha ifitusakamika no kutuletela ubulanda.—Esaya 65:17.