Ni Nani Uulenga Tulecula?

Nga ca kuti Lesa te ulenga ukuti tulecula, cinshi cilenga kuleba ifipowe fyabipisha, ubupiina bwakapela makufi, inkondo, amalwele yabipisha na masanso? Icebo ca kwa Lesa Baibolo calilanda pa fintu fitatu ifilenga abantu balecula:

1. Bukaitemwe, Ubufunushi no Lupato. “Umuntu atekela umuntu munankwe ku kumucusha.” (Lukala Milandu 8:9) Ilingi line icilenga abantu balecula ni co balabacusha ku bantu bambi abashapwililika, bakaitemwe kabili abankalwe.

2. Inshita ne Fintu Fyabula Ukwenekela. Icilenga ilingi line abantu balecula ni co “inshita ya fintu fyabula ukwenekela ifikila fye umuntu uuli onse.” (Lukala Milandu 9:11) Aya amashiwi yalola mu kuti ifintu ifyabipa kuti fyacitikila abantu pa mulandu wa mulekelesha nelyo ukuba pa ncende ne nshita ilyo ubusanso bwacitika.

3. Umubifi E Uteka Icalo. Baibolo yalilanda ukwabula ukupita na mu mbali icilenga maka maka abantu balecula. Itila: “Icalo conse calaala mu maka ya mubifi.” (1 Yohane 5:19) Uyu “umubifi” ni Satana Kaseebanya, uwali malaika wa kwa Lesa uwa maka, lelo ‘uushatwalilile ukuba mu cine.’ (Yohane 8:44) Bamalaika bambi nabo balipondokeele Lesa pa kuti fye bacite ifyo balefwaya, kabili ici calengele baba ifibanda. (Ukutendeka 6:1-5) Ukutula apo Satana ne fibanda bapondokeele Lesa, balabeleleka abantu kabili balalenga ifintu ukulabipilako fye, maka maka muno nshiku. Pali ino nshita Satana aliba ne cipyu icikalamba, e ico ‘alalufya aba pano isonde bonse,’ kabili ici ‘calibipila fwe baikala pe sonde.’ (Ukusokolola 12:9, 12) Ukwabula no kutwishika Satana ni kateka umunkalwe. Alomfwa bwino abantu nga balecula. Kanshi te Lesa uulenga abantu balecula, lelo ni Satana.

TONTONKANYENI PALI ICI: Umuntu uushaba na luse kabili umubifi e wingalenga fye abantu bakaele ukulacula, lelo Baibolo itila: “Lesa kutemwa.” (1 Yohane 4:8) Apo aliba no kutemwa, “Lesa wa cine te kuti acite ifyabipa, Uwa Maka Yonse te kuti afyenge umuntu nakalya!”—Yobo 34:10.

Na lyo line, nalimo kuti mwayipusha ukuti, ‘Bushe Lesa Uwa Maka Yonse akaleka Satana akatwalilile fye ukucusha abantu?’ Nga fintu tumwene, Lesa alipata ububifi, kabili alomfwa sana ububi nga amona tulecula. Na kabili, Icebo cakwe citweba ukuti: “Mulepoosa amasakamika yenu yonse pali ena, pantu asakamana imwe.” (1 Petro 5:7) Apo alitutemwa kabili alikwata na maka, nomba line akafumyapo ukucula no lufyengo, nga fintu icipande cikonkelepo calalanda.a