Bushe Kuti Mwayasuka Ici Cipusho?

Cinshi calengele umusambi Stefani ateke umutima kabili ashipikishe ilyo balemucusha?

STEFANI balemucusha kwi bumba lya baume abakalipe nga nshi. Aba abaume abali 71 bali ni bakapingula ba cilye cikalamba ica Sanhedrini kabili bali pa baume abakwatishe amaka mu Israele. Uwa balonganike ni Shimapepo Mukalamba Kayafa uwatekeshe icilye imyeshi iinono ku numa ilyo bapingwile ukwipaya Yesu. (Mat. 26:57, 59; Imil. 6:8-12) Ilyo inte sha bufi shaleisa umo umo mu kushinina Stefani ifya bufi, ifyacitike fyalipeseshe bonse abali mu cilye amano pantu icinso ca kwa Stefani calemoneka “nge ca kwa malaika.”—Imil. 6:13-15.

Cinshi calengele Stefani atwalilile ukushipikisha no kuteka umutima nangu ca kuti balemutiinya? Ilyo bashilamutwala ku cilye ca Sanhedrini, umupashi wa kwa Lesa waiswile muli ena kabili wamulengele ukulabombesha mu mulimo wa kwa Lesa. (Imil. 6:3-7) Ilyo balemulubulwisha, uyu wine umupashi wa mushilo walimwafwile ukushipikisha kabili wamulengele ukwibukisha amalembo. (Yoh. 14:16) Icipandwa 7 ice buuku lya Imilimo cilanga ukuti ilyo balemulubulwisha umupashi wa mushilo walengele aibukisha nalimo amalyashi 20 nelyo ukucilapo ayaba mu Malembo ya ciHebere. (Yoh. 14:26) Lelo icitetekelo ca kwa Stefani cakosele sana ilyo amwene Yesu mu cimonwa naiminina ku kwa kulyo kwa kwa Lesa.—Imil. 7:54-56, 59, 60.

Nalimo na ifwe bushiku bumo kuti batendeka ukututiinya no kutucusha. (Yoh. 15:20) Nga ca kuti tuleisambilisha ifyaba mu Cebo ca kwa Lesa lyonse kabili tulebombako umulimo wa kubila imbila nsuma, ninshi tulefwaya umupashi wa kwa Yehova uletwafwa. Na kabili tukaba na maka ya kutwalilila ukuba abashipa no kulasekelela na lintu baletucusha.—1 Pet. 4:12-14.