Bushe Kuti ‘Mwaabukila ku Makedonia’ no Kubaafwa?
1 Fwe bengi twalishiba amashiwi ayatila: “Mwise mwabukile ku Makedonia no kutwafwa,” kabili twalishiba ne calengele ukuti yalandwe. (Imil. 16:6-10) Paulo na Barnaba balitemenwe abantu. Ku micitile yabo balangishe ukuti bali abaitemenwa. Ilelo tulamona ukuitemenwa kumo kwine pa babomfi ba kwa Yehova. (Ilu. 110:3) Bamo pali imwe balikuukila ku filonganino fimbi pa kuti bengafwilisha ukushimikila mu fifulo ifishibombelwamo ilingi no kulakoselesha bambi. Natushininkisho kuti abacitile fyo balipaalwa nga nshi nga fintu Paulo na Barnaba bapaalilwe.
2 Twilatontonkanyo kuti ni baeluda na bapainiya epela e balingile ukukuukila ukuli ukukabila kukalamba. Ilingi Sosaite ilapokelela bakalata ukufuma kuli bakangalila ba miputule ne filonganino ukulomba indupwa ishingakuuka no kubaafwako, ukusanshako ukubaafwo kushimikila mu cifulo cabo ica kubombelamo. E ico, bonse abo imibele ingasuminisha balekoseleshiwo kutontonkanya pa kukuukila ku fifulo ifishibombelwamo ilingi no kubombako imyeshi ibili, iya July na August, uno mwaka. Ici cikaba ca kukumanya mukalaibukisha pa nshita ntali, apantu mukasango kuti abantu balankulako bwino mu fifulo ifishabombelwamo pali ndakai.
3 Ababomfi Abaitemenwa Balekabilwa Nomba line: Lintu fye icilonganino ca Bwina Kristu capangilwe caingile mu nshita ya kupikintika. Abena Kristu balekabila ukushimikisha imbila nsuma ilyo Yerusalemu ashilaonaulwa mu 70 C.E. Pali iyo nshita abasambi ba kwa Yesu ‘balyobelwe ukubile cebo.’ (Imil. 18:5) Ukulunduluka kukalamba kwalengele ukuti na bambi bakabila ba mbila nsuma na bakacema ba kampuka bakanshiwe pa kuti bengafwilishako. Abaume ababelesha ukubomba no buteko, ukusanshako na bakampuka abengasakamana imisangulo no kwakanya ifikwatwa balekabilwa. (Imil. 6:1-6; Efes. 4:11) Nangu cingati bamo bamo balilumbwike, icinabwingi tabalumbwike. Lelo bonse ‘balipilikite,’ ukubombela capamo no mutima onse ku kupwishishisho mulimo.—Luka 13:24.
4 Lyene, cinshi cilengo kuti ukuitemenwa kwa bantu ba kwa Yehova kube ukwaibela? Ni bukapekape. Bukapekape bwabo tabubimbamo fye ukupeele ndalama nelyo ifikwatwa, bubimbamo ‘ukuipeela.’ (Ilu. 110:3) Ubu bukapekape e bulengo kuti tuleipeela kuli Yehova. Tulalambulwa mu nshila yaibela. Tulaba ne ‘nsansa ishingi’ kabili ‘tulaseepe fyafula’ pantu bambi pa kutasha imilimo yesu, balatupeela. (Imil. 20:35; 2 Kor. 9:6; Luka 6:38) Shifwe wa mu muulu, Yehova aba ni Kaafwa wesu uwakulisha, ‘uwatemwa umupe wa nsansa.’ (2 Kor. 9:7) Akatupeela amapaalo ayengi ayabelelela.—Mal. 3:10; Rom. 6:23.
5 Calicindamisha ukukwata umulandu usuma nga mulepanga ukukuukila ukuli ukubulisha kwa bakashimikila. Tulingile ukukuuka pa mulandu wa kufwaya ukwaafwa. Munyina umo uwabomba no mukashi no mwana umwaume pa myaka iingi mu filonganino ifikabila ukwafwiwa, alandile ukuti ilingi ukwangushako imikalile yenu kulakabilwa. Atile: “Mwilaesha ukwalula icilonganino ukuti cimuwamine, lelo bombeleni pamo na co, ukushintilila pali Yehova ilyo mulefwaya incito, umwa kwikala, na fimbi. Itemenweni ukupokelela ifyo Apayanya.” Iyi mitubululo ishaiwamina! Kangalila wa kutangilila mu Cilonganino ca Maera alembele ukuti: “Icilonganino cesu calimwenamo muli bapainiya babili abapimpa abaishile mu kutwaafwa. Amasambililo ya Baibolo aya mu Ng’anda ayali 48 ayatungulwilwe uno mweshi yalicila pali bakasabankanya 15 aba mu cilonganino cesu. Abalesangwa ku kulongana kwa cila mulungu nabafula. Pa numa ye sambililo lya Ulupungu lwa kwa Kalinda, umo alandile ukuti Inte sha kwa Yehova e mipepele iiliisha bwino lwa ku mupashi abantu ba iko.”
6 Kabili ibukisheni ukuti mu ncende ishingi ishikabila ukwafwiwa, ilingi line incito tashimonwamonwa. Ilyo mulepanga ukukuuka mulingile ukupepa. Pendeni ishingapooswa. (Luka 14:28) Calicindama ukupepa kuli Yehova, pamo ngo lupwa, ukulombo kuti amutungulule. Kabili umo na umo mu lupwa alingile ukwafwilisha uku kutantika. Bushe mwaliba abaitemenwa ukuipusula no kuteulula imikalile yenu?
7 Cinshi mulingile ukucita nga mulepango kukuukila ku cilonganino ukuli ukukabila? Intanshi, belengeni icitabo ca Abateyanishiwa pe bula 134 na 135. Lyene lembeni kalata, mubikemo ne shina lya mwina mwenu, no kupeela komiti wa mulimo ukuti alembe nga nasumino kuti namulinga ukubombo yu mulimo. Komiti akasaina uyu kalata no kutumina Sosaite.
8 Kwaafwa kwa Musango Nshi Kulekabilwa? Yesu pa kulangililo kuti kwalekabilwa na bambi abatumikishi ba Bwina Kristu, atile: “Ukulobolola kwena kukalamba, lelo ababomfi nabacepa.” Nangu cingati e fyo cali mu kasuba ka kwa Yesu, nomba nacicilamo muli ino nshita ya mpela. E ico, mu kumfwila ikambisho lya kwa Yesu, ‘tulelomba Umwine wa kulobolola, ku kuleka atume ababomfi mu kulobolola kwakwe.’—Mat. 9:37, 38.
9 Nangu cingati ukulobolola kwesu nakutantalila, umulimo ucili taulapwa. Yehova Lesa acili alepaalo butumikishi bwesu mu kuba no kwingilishiwako kukalamba mwi bala, kabili ukukansha abapya kwalyafya. (Mat. 28:20) Muno Zambia ifilonganino ifingi mu mishi tafileshimikila lyonse mu fifulo fyapeelwa pa mulandu wa kuti fyalikulisha. Mu kampampa ifi filonganino filekabila ababomfi abengi aba kushimikila mu fifulo fya kubombelamo no ‘kufwayamo abayana.’—Mat. 10:11.
10 Na kabili ifilonganino fimo filekabila sana ukukoseleshiwa lwa ku mupashi. Baeluda, ababomfi batumikila, indupwa sha Bwina Kristu ishakosa, na bapainiya kuti babomfiwa mu filonganino fyafulilako. Lintu ababomfi abaitemenwa aba musango yo bailunda ku cilonganino, bamunyina balakoseleshiwa, no kulunduluka ilingi line kulabako. E co lintu kwabako amashuko mu mulimo wa kwa Yehova, bushe mukaipeelesha no kwasuka, nga Esaya uwatile: “Moneni, ine; ntumeni.”—Esa. 6:8.
11 Nga ca kuti icilonganino mwabamo cilashimikila lyonse mu cifulo capeelwa nelyo nga ca kuti balikumanina baeluda, ababomfi batumikila, nelyo bapainiya aba kusakamano kukabila kwa pa mwenu, bushe bamo te kuti muipeeleshe ukuyaafwilisha kumbi? Kuti cawama umo na umo ne ndupwa babebete ifya bupe fyabo, ifikwatwa, na maka ifya ku mupashi. Bushe kuti mwayabombako ku “Makedonia” pa nshita inono nangu fye ukukuukilila ku kwaafwa icilonganino icakwata ababomfi abanono?
12 Na kabili ibukisheni ukuti mu filonganino ifinono ilingi mukalalanda amalyashi pa kulongana, kabili ukulongana kuti kwapusanako ne fyo mwabelesha. Umute wa kwaafwa bamunyinenwe no kubatemwisha filakabilwa. Mufwile ukumfwikisha ifyo cipilibula ukuipusula. Bushe kuti mwabomba? Ukukabila e ko kuli! Bushe namuipeelesha?
13 Ni Shani Uku Kukabila Kwingekushiwa? Apo inshita ya ino micitile ikote ilecepelako, kuti cawama ukwaafwa bamunyinefwe e lyo na bambi aba mitima ya bufumacumi abacili baleumfwa icilaka ca cine. Tulemupepelako pali uyu mulandu wacindama. Shi Yehova atutungulule ilintu bonse pamo tuleshimikila imbila nsuma mu kushipa.—Imil. 4:29.
14 Twapaapaata moneni umutande uwa fifulo mulekabila ukwaafwa. Natucetekelo kuti abengi abali abaitemenwa ukukuukila kuli ifi fifulo balifishiba. Abalefwayo kwishiba ukwabela ififulo balefwayo kukuukila kuti balembela ifyo filonganino no kwipusha ifyo bengenda. Abo bamunyina nga balefwaya ukulemba kalata kuti babomfya akeyala kakonkapo: (Ishina lya cilonganino umuli ukukabila), c/o Watch Tower Society, Akabokoshi 33459, LUSAKA. Lyene Sosaite ikatuma uyu kalata ku cilonganino ukuli ukukabila. Mu mulimo wenu uwa mwi bala, tulemukoselesho kutambika broshuwa wa Cintu Lesa Afwaya nelyo icitabo ca Ukwishiba. Abene mayanda nga balikwata ishi mpapulo, kuti mwatambika shimbi.
15 Tulecetekelo kuti mukashimikilako Sosaite pali fimo ifya buseko bwa kucincimusha ifyo mukakwata mwi shuko lya kuba bakasenda ba mbila nsuma mu fifulo ifishibombelwamo ilingi. Tulepepela amapaalo ya kwa Yehova yabe pali uku kutantika na pali imwe.