Ukwafwilisha Imisepela Ukutamya Ukusonga Kwabipa

¹ Bushe mulasanga ukuti ukunashanasha abacaice ku kutesekesha ubucindami bwa Cebo ca kwa Yehova kuti kwaba kwa kusonsomba? (Amapinda 22:15) Ni shani fintu twingakosha imisepela ku kutamya akayofi? Umutumwa Paulo atile: “Ku baYuda naishileba ngo muYuda, ukuti ngwikishe abaYuda.” (1 Kor. 9:20) Mu kupalako, ukwafwilisha imisepela ukusanga no kutesekesha ubutungulushi bwalinga ubwa ku mupashi cifwaya ukuti mumfwikishe abacaice ne mpika shabo. Umutande wa filimo mu citabo ca Abacaice Bepusha waliba ni ntulo yawamisha iya mfundo pa lwa fya kulandapo. Pa kuba uwabeleshanya ne yi mitwe, mukakwata ukwiluka cintu abacaice abengi batontonkanyapo ilelo.

² Lintu mulelanda no musepela, pano palipo imipeelele yayanguka.

Pa numa ya kuposhanya, langisheni icikope pe bula 105, kabili ipusheni ukuti:

◼ “Mulandu nshi cabelo kuti imyaka ya bupungwe yaba ilingi line ni ntulo ya kukanshika kwa mu nkuntu? [Suminisha ukwankulako.] Ici citabo cilekulanga ifyo Baibolo ingafwilisha abacaice ukubomba ne mibele yaafya, pamo nga ilya itantikwe mu filimo.” Lyene shalikeni citabo.

³ Pa numa ya kuilondolola, kuti pambi mwatila:

◼ “Ndi uwa nsansa ukukwata ishuko lya mu nshita ilya kulanda kuli iwe pantu kuti natemwa ukumfwa imimwene ya wacaice. Lesa asosele icintu cimo muli Baibolo ico ukucilisha calungatikwa ku bacaice ukupala iwe wine. [Belengeni Lukala Milandu 12:1.] Cilangililo kuti tufwile ukwibukisha Lesa mu bwaice bwesu nga tulefwaya inshita ya ku ntanshi iya nsansa. Bushe ulayumfwe fyo ulingile ukusekelela muli Lesa, Kabumba obe? Bushe ici calikwata icili conse ica kucita ne nshita yobe iya ku ntanshi?” Suminisheni ukwankulako. Lyene losheni ukusakamana kwi tontonkanyo ilyalumbululwa mu paragrafu 2 pe bula 319 ilya citabo ca Abacaice Bepusha. Shalikeni icitabo kabili imyeni icipusho cintu mukalanshanya pa kutandala kwenu ukukakonkapo.

⁴ Nelyo pa numa ya kuposha mwine ŋanda, kuti mwatila:

◼ “Abafyashi te kuti mu kukumanina bacingilile abana babo ukufuma ku kusonga kwabipa. Lelo ni shani fintu umuntontonkanya wa mwana wingakoshiwa? [Suminisheni ukwankulako.] Baibolo ilatulanga inshila. [Belengeni Abena Efese 6:4.] ” Kuti pambi lyene mwatwalilila, ukusoso kuti: “Icitabo ca Ifipusho Abacaice Bepusha—Ifyasuko Fibomba cateyanishiwa ku kwafwilisha abacaice. Na kabili cafwilisha abafyashi ukupelulula na bana babo ukukuma ku fipimo fyalungama.”

⁵ Ukutununuka kumbi kuti kwaba kusonta kwi bula lya filimo ilya citabo ca “Abacaice Bepusha” no kusoso kuti:

◼ “Ilelo tuleipusha abena mupalamano besu, Ni kwi muletontonkanya uko abacaice bengasanga ifyasuko fya bufumacumi, ifingabomba ku fipusho bepusha, pamo nga: ‘Cinshi cintu inshita ya ku ntanshi yankwatila?’” Suminisheni ukwankulako. Lyene mulangeni icitabo ca Abacaice Bepusha no kulandapo ukuti inkama ine ine iya kutunguluka kwa ici citabo yaba mu cishinka ca kuti ifyasuko ifyapeelwa fyashimpwa, te pa mfundo sha kwelenganya fye nelyo imimwene ya muntu, lelo pa cine ca ciyayaya icisangwa mu Cebo ca kwa Lesa, Baibolo. Citeni ukushalika. Nga ca kuti mwine ŋanda apoke citabo, salenimo umutwe uyo pambi wingalanshanishiwapo pa kutandala kwenu ukukakonkapo.

⁶ Yehova ‘tafwaya uuli onse ukonaika.’ (2 Petro 3:9) Ici cisanshamo imisepela. Nangu cibe fyo, abacaice abengi tabakapusunsuke Armagedone. Shi ukubombesha kwesu ukwa kushimikila ku misepela mu kufumamo cimo kukafumemo ipusukilo ku mpendwa ikalamba iya bacaice, ku kulumbwa kwa kwa Yehova. Na kabili shi natwaafwe abafyashi ukumona ukukabila kwa kubomfya icitabo ca Abacaice Bepusha mu kulanshanya kwabo na bana babo.