Pekanishisha Abasambi ba Baibolo ku Butumikishi
1 Ubuyo bwa kupelako mu kutungulula amasambililo ya Baibolo bwaba kupanga abasambi bapya, bakabomba abakailunda kuli ifwe mu kusambilisha bambi. (Mat. 28:19, 20) E co imifwaile ye sambililo tayaba fye kupeela ubwishibilo; ilingile ukulimba icitetekelo ca kufuma ku mutima mu basambi besu no kubapekanishisha ukwakana isubilo lyabo na bambi. (2 Kor. 4:13) Ni mu nshila nshi ishibomba twingabafwilamo ukuba abafikapo ku kusambilisha bambi?—2 Tim. 2:2.
2 Imika Ubutumikishi ngo Buyo: Ukufuma fye pa kutampa pene, cilenge ukumfwika ukuti ukupepa kwa cine kubimbamo ‘kulumbulula pa kupusuka.’ (Rom. 10:10) Ishina lyesu line, Inte sha kwa Yehova, litubulula ukuti tufwile ukulanda kuli bambi. Baafwe ukumone fyo ukusambilishiwa kwabo te kwa kupusukilamo fye abene beka. Lintu abene bene basanguka bakasambilisha, abo abakutika kuli bene na bo balakwata ishuko lya kupusuka.—1 Tim. 4:16.
3 Pituluka mu Casambililwa: Ukupitulukamo kwa ku nshita ne nshita mu cisambililwe kwaba ca kwaafwa ica kusambilisha cakatama. Kwaafwa umusambi ukukula lwa ku mupashi ilyo icine cipya icasambililwa cilelimbwa mu muntontonkanya wakwe no mutima. Twalikumanya ici fwe bene lintu tuleasuka ifipusho fya kupitulukamo ifyo fisanshiwa mwi Sambililo lya Ulupungu lwa kwa Kalinda. Pekanya ifipusho fyayanguka, ifya kulungatika ku musambi obe ku kwasuka mu mashiwi yakwe yene.
4 Ukupitulukamo kobe kuti kwaba mu musango wa mitantikile ya mu mulimo wa mwi bala. Ipusha icipusho nelyo londolola imibele iikumanishiwa ilingi line pa kucitilo bunte kuli bambi. Mu kuba na iwe ukubomba nga mwine ŋanda, leka umusambi obe alangilile ico engasosa. Mutashe umo acicita bwino, kabili tambika imitubululo ibomba iyo ikamwaafwa ukuba uwacilanapo kufumamo cimo inshita ikakonkapo. Uku ukukansha kukamusambilisha ifya kubomfya cintu asambilila kabili kukalundulula ukulamuka kwakwe mu kubomfya Baibolo.
5 Icitabo ca Ukupelulula: Shininkisha ukuti umusambi obe nakwata kope wa citabo ca Ukupelulula, kabili mukanshe ukubomfya cene. Langa fintu cipayanya imitubululo pa kutampa ukulanshanya, ukwasuka ifipusho fya Baibolo, nelyo ukubomba no kukaanya. Bomfya icitabo icili mwi sambililo ku kulangilila inshila sha kulandilamo kuli bambi mu nshila ya kushinina. Ici citabo kuti calundulula ukuicetekela kwakwe, ukwingilishako ukuitendekelako kwakwe ku kubilisha ubukombe bwa Bufumu.
6 Ebekesha Ubucindami bwa Kulongana: Ukulongana kwa cilonganino, ukucilisha Ukulongana kwa Mulimo ne Sukulu lya Butumikishi bwa Teokratiki, kwabelako ku kutupekanishisha ku mulimo wa mwi bala. Ifikabilwa fyonse ifya kutendekelako ku kucitila ubunte kwafumamo cimo filapitulukwamo no kulangililwa kuli abo ababa ababelesha kabili abalamuka. Komaila pa bucindami bwa kulongana, kabili cita apo wingapesha ku kumwaafwa ukusangwako. Ukusangwako kwa lyonse kuti kwapayanishisha umusambi obe ukucincisha akabila ku kuba umusambi wa cine uwa kwa Yesu.
7 Icishilingile kusuulwako cili ca kumwenako ca pa lobe ciine. Ukuitemenwa kobe no kuba uwa lyonse kobe mu mulimo wa kushimikila kulanga ukutesekesha kobe ukwashika ku cine. Inshila ya musango yo ilakoselesha umusambi obe ukucita ifyafulilako ku kulangisha icitetekelo cakwe. (Luka 6:40) Ici conse kuti caafwa umuntu mupya ukumona ubutumikishi nge shuko kabili ukuba uwa kutasha pa kwakana muli bwene.—1 Tim. 1:12.