Umukululo wa Fipusho

◼ Ni shani fintu twingasuka mu nshila yacilapo kufumamo cimo pa kulongana?

Tulolesha ku ntanshi ku kubungana capamo pa kulongana kwa cilonganino ukwa cila mulungu. Palya e po tukwata ishuko lya mu nshita ilya kulumbulula icitetekelo cesu no kukoselesha bambi ku kwasukapo kwesu. (Amapi. 20:15; Heb. 10:23, 24) Tulingile ukumona ukwasukapo nge shuko kabili tulingile ukutukuta ukwakanamo lyonse. Ni shani fintu ici cingacitwa mu nshila yacilapo kufumamo cimo?

Ukupekanya lwaba e lutampulo lwa ntanshi. Ukubelenga no kulingulula pa fyebo mu kubangilila calicindama. Esha ukwikasha ubupilibulo bwa cilelandwapo. Nangu cingati isambililo kuti pambi lyalilandwapo ku nshita yapita, fwaya ifishinka ifili fyonse ifiletanununwa nelyo ukuluminishiwa ifipeelwe. Sunga mu muntontonkanya umutwe ukalamba uwa fyebo. Lintu ulepekanya ifya kulandapo ukufuma mu lupapulo ulo lukwete isambililo lyashika ilye buuku lya Baibolo, pamo nga icitabo ca Akalume ka Ukusokolola, esha ukumona fintu icikomo cimo campene ku fikomo ifishingulwike kuli cene. Ukukonka iyi mitubululo kukabimbula amaka yobe aya kutontonkanya. Kukakwaafwa ukupekanya ifyasuko fisuma kabili ukasanga ubuseko mu kwakanamo kobe.

Ifyasuko fyawamisha filaba ifiipi, ifyayanguka, kabili ifishimpilwe pa lupapulo lulesambililwa. Uwa kubalilapo kulandapo alingile ukwasuka icipusho mu kulungatika, ukushako ifishinka fimbi ku kulandapo kwa kulundapo. Sengauka ukulandapo kwalepa, ukwa kukonkobola tonse uko kusenda inshita yacishamo no kulesha bambi ukwakanamo. Ilumbulwile mu mashiwi yobe we mwine, ukucilo kubelenga fye icasuko cobe ishiwi ne shiwi ukufuma mu lupapulo. Ukulandapo kwa kusonsapo kuti kwasanshamo ifishinka ifili mu Malembo yaloshiweko. Kutikisha ku cintu bambi balesosa pa kuti usengauke ukubwekeshapo kushafwaikwa ukuli konse.

Caliwama ukwimyo kuboko imiku yafulilako lelo te pali paragrafu uuli onse. Tulalaalika abacaice ukwakanamo mu kwasukapo. Nga ca kuti ulashimunuka ku kulandapo, kuti pambi waishibisha katungulula mu kubangilila paragrafu uo wingatemwa ukwasukapo, kabili mu kupalishako akakupeele shuko lya kucite fyo.

Ifwe bonse tulingile ukubombesha mu kucincila ukukwatako ica kuyapeela pa kulongana kwa cilonganino icilesanshamo ukwakanamo kwe bumba lyonse. Ibukisha, ukutunguluka kwa kulongana kwa musango yo kushintilila ku cipimo cikalamba pa kuitemenwa kwesu no kufumamo cimo mu kwasukapo.—Ilu. 26:12.