“Loleni”
1 Lintu Yesu alandile amashiwi ayalembwa pali Mateo 26:38-41, alepalama ku nshita yakakala iya bumi bwakwe ubwa buntunse. Yali no kushininkisha ukuba e nshita yacindamisha mu lyashi lyonse ilya buntunse. Ipusukilo lya mutundu wa muntu onse lyali mu busanso. Abasambi ba kwa Yesu bakabile ukuba ‘abalola.’
2 Ilelo twiminine pa nembenembe ilyo Yesu ali no kufika mu lubali lwa minkubili ulwa kwa kalubula na kaputunkanya. Pamo nga Abena Kristu balola abaibukila ulwa kupamfya kwa nshita, tatwikala fye no kulolela ukulubuka. Twalishibe fyo tufwile ukuba abaiteyanya inshita yonse. Cili icakabilwa kuli ifwe ukutwalilila ‘ukucucutika no kupilikita’ mu mulimo wesu uwa kuli Yehova. (1 Tim. 4:10) Ni shani pa lwa ifwe umo umo? Bushe tuli abalola?
3 Ukuibebeta fwe Bene: Yesu na kabili asokele ati: “Muyangwe.” (Luka 21:34, 35) Tulingile ukuisakamana, ukushininkisho kuti tuli “ababula akalema mu kati ka nkulo iyapondama kabili iyapuuluka.” (Fil. 2:15) Bushe tuleikala cila bushiku nga Abena Kristu, ukupashanya Yesu no kwenda mu kumfwana ne fishinte ifyatantikwa mu Cebo ca kwa Lesa? Tufwile ukusengauka imyendele ishili ya Bwina Kristu iishibisha pano isonde “apalaala mu maka ya Mubifi.” (1 Yoh. 5:19; Rom. 13:11-14) Lintu twaibebeta fwe bene mu kusanikilwa na Malembo, bushe mu cine cine tuli abalola nga fintu Yesu akambishe?
4 Baeluda bafwile ukuba abacincila mu kubomba imilimo yabo mu cilonganino, ukwiluko kuti bakalubulula pa fyo basakamana umukuni. (Heb. 13:17) Imitwe ya ndupwa balikakililwako mu kuibela ku kutungulula ifinshingwa ŋanda fyabo ifya lupwa mu nshila sha kwa Yehova. (Ukute. 18:19; Yosh. 24:15; linganyako 1 Timote 3:4, 5.) Na kabili, fintu cili icakatama ukuti ifwe bonse tulefikilisha ukukambisha kwa mu Malembo ukwa kutemwana! E cishibisha ubuKristu bwa cine.—Yoh. 13:35.
5 Ibukila pa lwa Kusokako Bambi: Ukuba abalola kubimbamo ifyacila pa kuyangwa fwe bene. Twalitumwa ukupanga bambi ukuba abasambi. (Mat. 28:19, 20) Ukutemwa umwina mupalamano kulingile ukutusesha ukusokako bambi pa kuti bengapusunsuka ubonaushi ubulolenkene ne ci calo. Ici cishingamo icaba pa Bena Kristu bonse. Caba lubali lwakatama ulwa kupepa kwesu. (Rom. 10:9, 10; 1 Kor. 9:16) Ilingi line tulakumanya ukukanayangwako nelyo ukukaanya kwa kulungatika kuli uyu mulimo wa kupususho bumi. Twalikakililwako ukutwalilila, nangu fye icinabwingi bengasuula ukusoka kwesu. (Esek. 33:8, 9) Ukutemwa Lesa ukwa cine cine no mwina mupalamano e kukatusesha ukutwalilila.
6 Ino taili ni nshita ya kuba no muleketela. Tatulingile ukusuminisha amasakamika ya cila bushiku aya bumi ukuti yatupumbule nelyo ukubimbwamo nga nshi mu mabuseko ya ino micitile ica kuti yasanguka nge citeyo. (Luka 21:34, 35) Ino e nshita yacilishapo kube ye pamfya pali shonse. Inshita ilepalamina lubilo lubilo iya kuti Yesu Kristu aputunkanye ubupingushi ukulwisha ino micitile ibifi. Ni abo fye beka abashibuka, abaibukila, na balola e bakapusunsuka. Nga ca kuti twaumfwila amakambisho ya kwa Yesu kabili “[twakosa] ku kupusuka kuli ifi fyonse,” fintu tukaba aba kutootela!—Luka 21:36.