Bushe Ifishimiko fya kwa Yehova Filetucincimuna lwa ku Mupashi?
1 Kemba wa malumbo atooteele Yehova, ukusoso kuti: “Ifishimiko fyenu e kwetetula kwandi.” (Ilu. 119:99) Ishiwi lya ciHebere ilyapilibulwa “ifishimiko” lipeela itontonkanyo lya kuti Yehova alatwibukishako icalandwa mu malango yakwe, ifya kulangulula fyakwe, ifipoope fyakwe, amafunde yakwe, na makambisho yakwe. Nga ca kuti twayankulako, fikatucincimuna lwa ku mupashi no kutulenga ukuba aba nsansa.—Ilu. 119:2, NW.
2 Pamo nga abantu ba kwa Yehova, libili libili tulapokelela ukukonkomesha no kufunda. Ubwingi ubwa uko kukonkomesha twalikumfwapo kale. Nangu cingatila tulatesekesha uku kukoselesha, tukongamina ku kulaba. (Yako. 1:25) Yehova mu kutekanya alatupayanishisha ifya kucinkulako fyabamo kutemwa. Umutumwa Petro alembele fimo ifya ifi fya kucinkulako pa kuti ‘twibulule mitima yesu ku kuleka twibukishe funde lya kwa Shikulu.’—2 Pet. 3:1, 2.
3 Mu kubwekeshabwekeshapo tulacinkulwako pa lwa bucindami bwe sambililo lya pa lwesu no kusangwa ku kulongana. Uku kucinkulako kulacitwa pa mulandu wa kuti iyi mibombele yalikatama nga nshi ku butuntulu bwesu ubwa ku mupashi.—1 Tim. 4:15; Heb. 10:24, 25.
4 Icaba ukusonsomba kukalamba kuli bamo caba kufikilisha umulimo wa Bwina Kristu uwa kushimikila. Cifwaya ukubombesha, umupampamina, no mukoosha. Nangu line cifwaya ifingi kuli ifwe, tulafwilishiwa ‘ukwiminina’ pa kuba “abafwala ku makasa ukupekaniwa kwa mbila nsuma.”—Efes. 6:14, 15.
5 Umulimo wesu uli no kukuntwa ukufuma ku cacila pa kwibukila fye ulwa fifwaikwa fya kwa Yehova. Umutumwa Paulo atucinkulako ukuti umutima e utupeela ukukuntwa kuntu tukabila pa ‘kulumbulula no kupusuka.’ (Rom. 10:10) Nga ca kuti twalikwata icitetekelo cakosa kabili nga ca kuti umutima wesu walikongamina ku fishimiko fya kwa Yehova, tukatuninkishiwa ukufilanda pa kulumbanye shina lyakwe.—Ilu. 119:36; Mat. 12:34.
6 Lintu twabombesha mu kucite milimo isuma, mu kulungama twenekelo kuti ici cikatuletelo kusekelela. (Luk. Mil. 2:10) Paulo aishibishe ukusekelela pamo nge cisabo ca mupashi wa kwa Yehova, kabili tulingile ukufwaisha ukucilangisha mu kukumanina. (Gal. 5:22) Petro alundileko kuti “ukucincila konse” kukalambulwa no butumikishi bwa kusandulula, ubuletako ukusekelela.—2 Pet. 1:5-8.
7 Lintu twalolenkana no kusonsomba kumo, tulingile ukwibukisha ukwiminina kwa batumwa ukwashangila ilyo babilishe abati, “Twafilwa ukuleko kulande fyo twamwene no kuumfwa.” (Imil. 4:20) Tulakoshiwa ukutwalilila lintu twaibukisho kuti ‘pa kucite fi fintu, tukaipususha fwe bene na ’baletumfwa.’—1 Tim. 4:16.
8 Tatukalifiwa nelyo ukufiitwa pa mulandu wa kupokelela ifishimiko libili libili. Ukucila, tulatesekesha mu kushika umutengo wa fiko uwapulamo. (Ilu. 119:129) Muli shino nshita ishayafya, twaliba aba kutootela ukuti Yehova atwalilila ukututumina ifishimiko ifya kutucincisha ku kupimpile milimo isuma!—2 Pet. 1:12, 13.