Baafwe Ukwiluka
1 Umutumwa Petro asuminishe ukuti ifintu fimo ifyalondololwa mu Baibolo ‘fyalyafyo kwiluka.’ (2 Pet. 3:16) Abengi balitontonkanya muli iyo nshila pa lwe buuku lya Ukusokolola. Nangu cibe fyo, ubupilibulo bwa liko bwalilengamikwa mu citabo ca Ukusokolola—Akalume ka Kuko Kakalamba Nakapalama! Ni shani fintu twingaafwa abalesekelela ukucibomfya mu nshila yawamisha?
2 Nga ca kuti mwalanshenye Ukusokolola 1:3 pa kutandala kobe ukwa kubalilapo, ili tontonkanyo kuti pambi lyabukulula ubuseko:
◼ “Ku numa twalanshenye fintu ukumfwikisha ibuuku lya Ukusokolola kwingaleta insansa. Nangu cibe fyo, insansa sha musango yo tashiishila fye. Tulakabila mupepi ne fintu fibili: Tufwile ukubelenga Baibolo, kabili tufwile ukubomfya fintu tulesambilila.” Belenga no kulanda pali Yakobo 1:25. Alukila kuli paragrafu 9 pe bula 8, kabili londolola fintu ukumfwikisha ibuuku lya Ukusokolola kwingatwaafwa ukwishiba fintu twinganonka insansa mu calo cipya icikaba paradise.
3 Nga ca kuti mwalanshenye Yohane 17:3 pa kutandala kobe ukwa kubalilapo, kuti wakomaila pa kukabila kwa kwishiba Baibolo kwalundwako pa kusoso kuti:
◼ “Inshita yafumako lintu nali pano, twabelengele pali Yohane 17:3 ukuti ukwishiba Lesa kuti kwatungulula ku mweo wa muyayaya. Lelo bushe kuti mwatemwa ukwikala kuli pe na pe mu calo capala ici twikalamo ilelo? [Leka asuke.] Abengi te kuti batemwe. Pali uyu mulandu, kuti twasekelela lintu twaumfwa cintu Lesa alaya.” Alukila kuli paragrafu 6 pe bula 303, belenga Ukusokolola 21:4, kabili lyene londolola fintu icalo cikaba ilyo “ifya ntanshi nafiya.” Mwebe fyo ukabwelelako ku kulanshanya kwalundwapo.
4 Nga ca kuti wabomfeshe icikope caba pe bula 302 ku kulangilila ukuti Ubufumu bwa kwa Lesa bukapwisha ubucushi, kuti waisula icitabo pali ilyo ibula na kabili no kusoso kuti:
◼ “Twalanshenye amapaalo yalangililwe pano ayo abantu bakaipakisha mu kuteka kwa Bufumu bwa kwa Lesa. Cinshi muletontonkanya tufwile ukucita nga ca kuti tulefwaya ukwikala pe samba lya bulya Bufumu? [Leka asuke.] Abantu bamo abalembwa mu Baibolo baimike ica kumwenako cawamisha icingatunonsha nga twacipashanya.” Belenga Imilimo 17:11, ukukomaila pa kukabila kwa ‘kufwayafwaya mu malembo akasuba na kasuba.’ Londolola ukuti Inte sha kwa Yehova baleafwa abantu bafumaluka mu bwikashi ukusambilila Icebo ca kwa Lesa no kucumfwikisha mu kuwaminako.
5 Nga ca kuti washiile trakiti wa “Bushe Ici Calo Cikapusunsuka?” kuli mwine ŋanda uwali uwapamfiwa nga nshi ku kulanshanya, kuti wabomfya iyi nshila:
◼ “Lintu natandele inshita ya nomba line, mwali abapamfiwa kwena. Nalimushiilile trakiti uyo waimishe icipusho ukukuma ku kupusunsuka kwa calo muli shino nshita sha fimfulunganya. Twabelengele ilembo lya Ukusokolola 21:4, ilyambwilwe muli cino citabo ca Ukusokolola—Akalume ka Kuko Kakalamba Nakapalama! [Belenga mu paragrafu 6 pe bula 303.] Ici cikope [pe bula 302] cilemupeelako icitontonshi ca fintu cikaba lintu ‘Lesa akafuute filamba fyonse ku menso yesu.’ Ici citabo cipeela ubushinino bwakosa ubwa kuti ubu bulayo bukafikilishiwa ku nshita ya ku ntanshi iipalamishe. Nga kuti mwatemwa ukucibelenga, ici mukwai.” Lumbula umusangulo wa ciko.
6 Nga ca kuti wasanga abantu abalesekelela, mu kupelako ukafwaya ukubalosha ku citabo Ukwishiba Uko Kutungulula ku Mweo wa Muyayaya no kucibomfya ku kutendeka isambililo. Mu kushininkisha ukasanga ubuseko bukalamba mu kwaafwa ‘[abashilabelesha, NW] ukwiluka.’—Ilu. 119:130.