Bombeni no Mutima Onse!
1 Twalikwata imilandu yafulisha iya kutashishapo Yehova. Iyi isanshamo ifintu ifyo atucitila ku numa, ifyo aletucitila nomba, ne fyo ali no kutucitila ku ntanshi. Cinshi cintu ukutasha kwesu kulingile ukutukunta ukucita? Ilumbo lya kwa Davidi lyayasuka ukuti: “Nkacindika Yehova inshiku shonse, ukumutasha kukaba pe mu kanwa kandi.”—Ilu. 34:1.
2 Baibolo mu kulengama ilanga ukuti twalikambishiwa ukushimikila. Uyu waba mulimo untu tubomba “no mutima onse, nga kuli Shikulu.” (Kol. 3:23) Tukabomba ubutumikishi ukufika pi nga ca kuti mu cine cine tubomba no mutima onse? Lintu twatontonkanya pa fintu Yehova atutemwa, mu kushininkisha tulakuntwa ku mitima yesu ukuipeelesha ku kubombako umulimo wa kwebako bambi pa lwa wene ne mifwaile yakwe iyawamisha! Tulakuntwa ukucita cintu twingaba na maka ya kucita.
3 Kuti cabamo kupelulula ukwenekela ukuti umuntu uubomba no mutima onse afwaya ukutontomesha ukwangwa kwakwe pa mulimo washila. Kemba wa malumbo, uyo mu kushininkisha ayumfwile muli iyo nshila, abilishe ukuti: “Imiku cinelubali akasuba na ‘kasuba ndamutasha.” (Ilu. 119:164) Abo bayumfwa nga fintu kemba wa malumbo ayumfwile bafwaya ukushukila utushita ku kulumbanya Yehova. Ilyo imibele yabo yabasuminisha, balabomba mu kupimpa ukufika pantu bengapesha.
4 Inshita Yonse Twalikwata Amashuko ya Kulumbanya Yehova: Tatufwile ukupembelela ukuti kano fye tulebomba mu mulimo wa ku mwinshi no mwinshi e lyo twashimikila imbila nsuma. Abo tubomba na bo incito, abo tusambilila na bo ku sukulu, balupwa lwesu, na bo twaishibana na bo bene bakabila ukuumfwa ubukombe bwa Bufumu. Lintu tuli pa lwendo, kuti twatendeka ukulanshanya uko kwingatungulula ku kucitilo bunte ku babomba mu hotela, ababomba umo baliila ifya kulya, abashitisha amafuta ya muli bamotoka, nelyo banamutekenya ba matakishi. Ilintu tuli pa ŋanda, kuti twashimikila ku bena mupalamano besu nelyo ku batwala ifipe mu mayanda. Nga ca kuti twatekwa mu cipatala, mwaliba banasi, badokota, na balwele bambi abo twingashimikilako mu lyashi fye.
5 Ubunte bwa mu Lyashi Bulaletako Ifya Kufumamo: Bushiku bumo baNte babili baleenda mu parka no kutendeka ukulanshanya no mulumendo uwaleololako amolu no mwana wakwe. Mu kupelako uyo mulumendo no mukashi wakwe balipokelele icine. Pa numa uyo mulumendo aishilesokolola ukuti inshita fye iinono ilyo talakumanya abo baNte babili, alipepele kuli Lesa, ukumweba ukuti, ‘Nga e ko mwaba, napaapaata lekeni imwishibe.’ Atontonkanya ukuti inshita bakumene na baNte mu parka yaba casuko ca kwa Yehova kwi pepo lyakwe.
6 Abo ababomba no mutima onse mu kufwaisha kwabo ukwa kwaafwa bambi lwa ku mupashi balakwata ubuseko bwakulisha. Balishiba ukuti umulimo wa musango yo, uubombwa “no mutima wa cishinka,” ulatemuna Yehova.—1 Imila. 28:9.