Umukululo wa Fipusho

◼ Kuicingilila nshi kulekabilwa lintu tuli umwaume no mwanakashi mu butumikishi bwa mwi bala?

Twalikwata umulandu wa kucetekela ukuti bamunyinefwe na bankashi balafwaya ukukakatila ku cipimo ca mibele isuma icasumbukisha mu myendele ya pa lwabo. Nangu ni fyo, twikala na bantu abakowela kabili aba mulekelesha, abashakwata umwa kupeleela ukukuma ku mibele. Ilintu nakalimo kuti twaba fye ne nkuntu iisuma, tulekabila ukupempwila lyonse ukusengauka ukulenga umuseebanya nelyo ukucita icintu cishasanguluka. Ici cilesanshamo ukuba abasakamanishisha ilintu tulebomba mu butumikishi.

Mu mulimo wa mwi bala ilingi line tulasanga abanakashi nelyo abaume abo bamoneka ukuba abasekelela mu cine mu kufumaluka. Nga ca kuti munyina aya pa ŋanda eka no kusangapo umwanakashi nelyo nkashi asangapo umwaume, kabili takuli uuli onse pa ŋanda, kwena kuti cawamisha ukushimikila pa mwinshi ukucila ukwingila mu ŋanda. Nga ca kuti umuntu alesekelela, kuti mwatantika ukubwelelako lintu mukaba na kasabankanya na umbi nelyo lintu abantu na bambi bakabapo pa ŋanda. Nga tamwingacita ici, kuti cawama ukupeela isambililo kuli nkashi, nga mwine ŋanda mwanakashi nelyo kuli munyina, nga mwaume. Ici e cibomba na lintu tuletungulula amasambililo ya Baibolo ku bashili baume banensu nelyo abanakashi banensu.—Mat. 10:16.

Tulekabila ukuba abasakamanishisha lintu tulesala uwa kubomba nankwe mu butumikishi. Nangu cingati munyina na nkashi nalimo kuti babombela pamo inshita shimo, ici kuti cawamisha nga bali ibumba. Ilingi line kwena tacawama munyina ukuba na nkashi ushili mwina mwakwe, nangu fye ni lintu tuli mu butumikishi. E ico, munyina aletungulula ibumba lya mu mulimo akapingulapo bwino lintu aleyakanya bakasabankanya ukubombela pamo, ukusanshako na bapungwe.

Pa kupingulapo bwino lyonse, tukasengauka “ica kupunwisha” napamo fwe bene nelyo bambi.—2 Kor. 6:3.