“Cincileni”
1 Lintu twaipeele kuli Yehova, twalaile ukuti tukalamubombela ukufika apo twingapesha. Ukulingana ne fyo, umutumwa Petro akoseleshe Abena Kristu ba mu mwanda wa myaka uwa kubalilapo ukucincila mu kushininkisha ukwiminina kwabo pa cinso ca kwa Yehova. (2 Pet. 1:10) Mu kushininkisha tufwaya ukucincila mu kutemuna Yehova ilyo tulemubombela ilelo. Bushe ico cisanshamo finshi? Ilyo ukwampana kwesu na Yehova kuleshikilako kabili twaetetula pali fyonse ifyo atucitila, umutima wesu ulatukunta ukulamubombela lyonse ukufika apo twingapesha. Tufwaya ukuwamyako ubutumikishi bwesu kabili, nga cingacitika, ukwingilishako imibombele yesu.—Ilu. 34:8; 2 Tim. 2:15.
2 Munyina wacaice uwalefwaya ukubombesha mu butumikishi asangile ukuti ukusambilila Icebo ca kwa Lesa lyonse kwamulengele ukutesekesha Yehova mu kushika kabili kwalimbile muli wene ukupimpa kwakulilako. Ici calengele ukuti epushe umulimo wa bupainiya. Nkashi uo cakoseele ukulanda ku beni apitulwike mu nshila sha kulandilamo shimo mu citabo ca Ukupelulula kabili mu kwangufyanya aleipakisha ukumona ifyo aletunguluka nga nshi mu butumikishi bwakwe. Alitendeke ukutungulula isambililo lya Baibolo ku baupana babili abasumine ukusambilila icine.
3 Sekeleleni pa Fintu Mwingacita: Bamo aba ifwe tulacula ku mibele yalekanalekana pamo nga ukulwalilila, ukukaanya kuli balupwa, ubupiina, nelyo ukukanapokelelwa mu cifulo ca kubombelamo. Amafya yambi ayengi ayaseeka muli shino nshiku sha kulekelesha kuti yacilikila umulimo wesu. (Luka 21:34, NW, utulembo twa pe samba; 2 Tim. 3:1) Bushe ico cilepilibula ukuti twalifilwa ukuipeelesha kuli Yehova? Te kuti cibe fyo nga ca kuti tulemubombela apapelele amaka yesu.
4 Tacawama ukulalinganya imibombele yesu ku fintu bambi bapwishishisha. Mu cifulo ca ico, Amalembo yatukoselesha ukuti “umuntu onse alinge umulimo wakwe wine.” Ukuipeela no mutima onse ukufika apo twingapesha cilatemuna Yehova kabili cilatulenga ‘ukuitakisha.’—Gal. 6:4; Kol. 3:23, 24.
5 Shi natumfwile amashiwi ya kwa Petro ku ‘kucincila ukuti tukasangwe ababula akabi kabili ababula akalema mu mutende.’ (2 Pet. 3:14) Uyo mupashi ukatulenga ukuyumfwa abacingililwa kabili ukatuletela umutende wa ku muntontonkanya uyo Yehova e ka fye engapeela.—Ilu. 4:8.