Ukuluminisha Umulimo wa Kushimikila Ilyo Impela Ilepalamina
1 Inshita ya kuseepa iba ni nshita ya kusekelela. Kabili iba ni nshita ya kubombesha. Kuba fye inshita iinono iya kukolonganika ifisabo. Kanshi tacikabila abakuseepa ukuba abanenuka.
2 Yesu mu mampalanya alingenye “impela ya nshita” ku nshita ya kuseepa. (Mat. 13:39, NW) Tuleikala ku mpela ya ino nshita, kabili inshita isheleko inono iya kuti tushimikile “ku fyalo fyonse.” (Mat. 24:14) Ilyo impela ilepalamisha nga nshi, tulekabila ukubombesha mu butumikishi. Mulandu nshi? Yesu atile: “Ukulobolola kwena kukalamba, lelo ababomfi nabacepa.”—Mat. 9:37, 38; Rom. 12:11.
3 Beni Abapamfiwa: Ilyo Yesu atendeke umulimo wakwe uukalamba uwa kushimikila, ashele fye ne myaka itatu na hafu iya kuti apwishe umulimo apeelwe. Ali uwapamfiwa ilyo aleshimikila, kabili asosele ati: “Ndi no kubile mbila nsuma ya bufumu bwa kwa Lesa . . . pa kuti e co natuminwa.”—Luka 4:43.
4 Uku e kupamfiwa kumo kwine Yesu asambilishe abasambi bakwe. (Marko 13:32-37) E mulandu wine “ubushiku no bushiku tabalekele ukusambilisha no kubila mwi tempele na ku myabo ukuti Yesu e Kristu.” (Imil. 5:42) Tabatangisheko imilimo iishacindeme. Nangu bashafulile, balishimikile imbila nsuma “ku cibumbwa conse ica mwi samba lya muulu.”—Kol. 1:23.
5 Kwalibako umulandu na umbi uukalamba uo na ifwe tulingile ukubela abapamfiwa ilelo. Mulandu wa kuti “impela ya fyonse naipalama.” (1 Pet. 4:7) Yehova alimika ubushiku ne nshita akapwishishamo cino calo. (Mat. 24:36) Umulimo wa kushimikila ukapwishishiwa muli iyi ine nshita isheleko. E mulandu tutwalilila ukulundako ukubombesha ukuti twingashimikila imbila nsuma ku bengi.
6 Ukupitila mu kuluminisha ukubombako umulimo wa kushimikila ilyo impela ilepalamina, tukaba no buseko bwa kusosa kuli Yehova nga fintu Yesu asosele ati: ‘Natupwisho mulimo uo mwatupeele ukuti tucite.’—Yoh. 17:4.