Ifyo Aba mu Lupwa Bekatana pa Kuti Babombeshe mu Butumikishi
1 Bushe kuli icingacilapo kutucincimusha ukucila ukumona abalume na bakashi, abafyashi na bana balebombela pamo mu butumikishi bwa Bwina Kristu, ukulumbanye shina lya kwa Yehova pa cintubwingi? (Amalu. 148:12, 13) Indupwa shonse shilingile ukutantika bwino ukulabombako lyonse mu mulimo wa mwi bala. Bushe mu lupwa lwenu mwalisalapo ubushiku bumo cila mulungu ubwa kubombako mu butumikishi? Nga mwalisalapo bumo, ninshi onse alishiba bwino ifyo alingile ukupekanya kabili kuti abombesha mu kushimikila.—Amapi. 21:5a.
2 Ilyo ubushiku bwa kushimikila bushilafika, bushe te kuti mupekanishishe limo pamo ngo lupwa inshila sha kulandilamo mukayabomfya? Ukupitulukilamo limo kulaafwa nga nshi, kabili kuti kwalenga mwaikatana bwino mu lupwa. Mwandi kulaba ukumwenamo nga ca kuti bonse mu lupwa batemwa ubutumikishi bwa mwi bala no kulapekanya bwino!
3 Kangalila wa muputule umo aile capamo na ba mu lupwa lumo bonse mu mulimo wa magazini. Lintu aleya alebomba ku ng’anda ne ng’anda umukashana umo uwa muli ulu lupwa amwipwishe ati: “Bushe mwalabomba na ine ukufika nshita nshi?” Lyene uyu mukashana alondolwele ukuti alabomba na ba wishi pa numa. Cine cine uyu mukashana aleipakisha ukubombela pamo na ba wishi mu mulimo. Mwandi ulu lupwa lwalikatana!
4 Indupwa shimo kuti shabombela pamo bupainiya bwa kwafwilisha mu mweshi umo mu mwaka. Limbi nangu fye umo mu lupwa kuti abomba bupainiya bwa kwafwilisha mu kutwalilila nangu fye ukulembesha bupainiya bwa nshita yonse. Nalimo bonse mu ng’anda nga batantika imibombele bwino no kwikatana, kuti balundako imibombele yabo mu mulimo ukupitila mu kutungilila uulebomba bupainiya. Cine cine ulupwa lukapaalwa ukupitila muli uyu mulimo waingilishiwako na mu fya kukumanya fisuma ifisangwa mu butumikishi.—Mal. 3:10.
5 Ukubombesha mu mulimo wa kubila imbila nsuma kukalenga indupwa ukwikatana, ukupimpa, ukubomba bwino, no kuba ne nsansa mu mulimo wa kwa Yehova!—Linganyeniko Abena Filipi 2:1, 2.