Bushe Kuti Mwayafwako?
1 Umutumwa Paulo akonkomeshe aba mu cilonganino ukuba “no kusakamanana kumo.” (1 Kor. 12:25) Muli fyo, tufwile ukwangwako no kwafwa bambi nga cakabilwa. Ku ca kumwenako, inkashi shesu shimo isha ku mupashi shilekusha abana mu cine ukwabula abalume. Umulimo onse uwa kusambilisha abana lwa ku mupashi waba pali aba bankashi. Cine cine balinga ukukoselesha kwa cikuuku no kwafwa kwingabomba ‘mu kukabila kwabo.’ (Rom. 12:13a) Bushe kuti mwabafwako?
2 Inshila Mwingabafwilamo: Ukubomfya bamotoka besu ukusendako balya ababomfya imyendele ya cintubwingi pa kuya ku kulongana na ku mabungano kuti kwalenga bapusushako indalama. Ukwafwako nkashi ukusakamana abana banono pa kulongana kuti kwalenga anonkelamo nga nshi mu kulongana. Mu nshila imo ine, ukuitemenwa ukumwafwa lintu aya na bana mu mulimo wa mwi bala kuti kwamwilululako. Ukutemwa sana abana—ukubalenga ifibusa—kuti kwayafwa sana abacaice besu ukukula bwino. Ukulaalikako umufyashi umushimbe no lupwa mu nshita mu nshita ukusangwa kwi sambililo lyenu ilya lupwa kuti kwamupembesulako lwa ku mupashi.
3 Beni Abashilimuka: Tufwile ukucenjela pa kuti tatupatikishe bambi ukuti tubaafwe nga ca kuti tabalefwaya. Kabili te kuti tufwaye ukulaingila mu milandu ya lupwa lwabo ilyo tulebaafwa. Kwena, bankashi na baupana e bengabomba bwino mu kwafwa nkashi ulekabila.
4 Abena Kristu bonse bakoseleshiwa “ukusekelela abeni.” (Rom. 12:13b) Ukwafwako bamunyinefwe ne nkashi ni nshila imo tulangishishamo ukutemwa kwapala ukwa kwa Kristu uko twakwata.—Yoh. 13:35.