Ukusambilila Icitabo ca Ukusesema kwa kwa Daniele

¹ Ukwamba umulungu wa April 17, tukalasambilila mu citabo ca Angweniko ku Kusesema kwa kwa Daniele! pe Sambililo lya Citabo mu Cilonganino. Abengi balipwisha kale ukubelenga ici citabo cishaiwamina, lelo nomba natukwata ishuko lya kuipakisha ifyaba muli ici citabo ukupitila mu kulanshanya na bantu abengi. Bakasabankanya bonse, abalesekelela, na bacaice baleitwa kabili balekoseleshiwa nga nshi ukuti cila mulungu balesangwa kwi sambililo lyashika pa lwe buuku lya mu Baibolo ilya kwa Daniele.—Amala. 31:12, 13.

² Ukutantika kwa Masambililo na Makambisho ya Kukonka: Ukutantika konse ukwa masambililo ya citabo ca Ukusesema kwa kwa Daniele kuli muli buno bwine Ubutumikishi Bwesu Ubwa Bufumu. Kuti mwakopolola uku kutantika no kubika akapepala mu citabo. Ukutantika kulelangilila icipandwa na maparagrafu yali mu citabo ne fikomo fya mwi buuku lya kwa Daniele ifikalasambililwa cila mulungu. Utulembo twa pe samba tulelondolola ifyo ukulanshanya pa fyebo fimo fimo mu citabo kukalaba na lintu kukalabako. Pa mpela ya kusambilila cila mulungu, katungulula ne bumba lyakwe balekoseleshiwa ukupituluka mu fikomo fipeelwe muli Daniele kabili ifitantikwe ukusambililwa mu mulungu wine uyo. Inshita nga yashalako, ifikomo kuti fyabelengwa no kulandwapo. Ifikomo fimo fikalalandwapo mu milungu ukucila pali umo pa mulandu wa kutwalilila kwe lyashi lilelandwapo muli ifi fikomo.

³ Pekanyeni Isambililo Bwino: Kwali ukubombesha na maka ukulinga ifya kusambilila cila mulungu pa kuti kwingalaba ukumfwikisha ifilesambililwapo no kukanapitamo fye ulubilo. Amasambililo yane yakaba ayepi sana. E ico, pa mpela ye sambililo mu mulungu wa June 5, katungulula kuti apituluka muli Daniele 2:1-40. Mu mulungu wa June 26, kuti apituluka muli Daniele 3:1-30. Mu mulungu wa September 4 ifikope fyonse na malembo yali pe bula 139 filingile ukulandwapo. Charti ali pa mabula 188 na 189 ali no kulandwapo mu mulungu wa October 2 pe sambililo lya citabo.

⁴ Pekanishisheni bwino isambililo lya cila mulungu, kabili mu kuitemenwa asukenipo. Ikatisheni ishuko lya kuba mu kuteyanya kwa kwa Yehova ukumoneka kabili nonkelenimo mu kushilimuka no kumfwikisha kuntu abasubwa ba citetekelo bapayanya. (Dan. 12:3, 4) Mu cikuuku koselesheni bambi ukusangwa lyonse kwi sambililo lya citabo. Shi natwangweko bonse ku cebo ca kusesema ica kwa Lesa icasokololwa mwi buuku lya kusungusha ilya kwa Daniele.—Heb. 10:23-25; 2 Pet. 1:19.