Bushe Muleshipikisha?
1 “Nshikwete ukusekelela ukwacisha pali uku . . . [ukwa kuti] abana bandi baleenda mu Cine.” (3 Yoh. 4) Ukushipikisha kwa bana ba ku mupashi aba kwa Yohane kwamulengele ukusekelela icine cine. Mwandi Shifwe wa ku muulu afwile alabekelwa mu kumona abantu abengi nga nshi abengafika ku kuba abana bakwe “baleenda mu cine”!—Amapi. 23:15, 16; 27:11.
2 Nangu line abantu ba kwa Lesa nge bumba lyonse baletwalilila mu mulimo wa Bwina Kristu, bamo baleya balenaka panono panono. Aba bantu nangu ca kutila ilyo basambilile fye icine baali abaswangaana, nomba ilyo imyaka yaya ilepita, batendeka ukubomba fye panono nelyo limo limo fye mu mulimo wa kupanga abasambi.
3 Bamo kwena te bene baitemenwa ukuti banenuke, ni co fye balalwalilila no kucula ku mafya yesa mu bukote. Lelo bafwile ukutashiwa pa kushipikisha kwabo. Balebomba apapela amaka yabo. Nalyo line, onse uwaipeela kuli Lesa afwile ukuipusha ukuti: ‘Bushe nalitendeka ukukonkelela sana ifya pa lwandi ica kuti mombako ifya Bufumu limo limo fye? Bushe nintendeka ukuba “uwa cifulefule,” nelyo bushe ncili ‘ndepilikita’?’ (Ukus. 3:15, 16; Luka 13:24) Shi ifwe bonse natulepepa no kutontonkanya pa fyo tulebomba, kabili shi natulewamyako umo tushilecita bwino, ilyo tuleibukisha ifyo Yehova atulaya ukuti “ubucindami no bukata no mutende fikaba kuli onse uubombo busuma.”—Rom. 2:10.
4 Ifya Kushipikisha: Cinshi cayafwile Yesu ukushipikisha? Paulo alondolwele ukuti: “Pa mulandu wa kusekelela ukwabikilwe pa ntanshi yakwe, ashipikishe ku capindama, ukusuule nsoni, no kwikala ku kulyo kwa cipuna ca bufumu ca kwa Lesa.”(Heb. 12:1-3) Ukusekelela ukwabikilwe pa ntanshi ya kwa Yesu kwalicindeme ukucila amesho yamuponene aya pa kashita. Ukwibukisha ukusekelela kwabikwa pa ntanshi yesu kuti kwatwafwa ukushipikisha na ifwe bene. (Ukus. 21:4, 7; 22:12) Nga twashintilila pali Yehova ku kutukosha mwi sambililo lya pa lwesu, ukusangwa lyonse ku kulongana, no mukoosha mwi pepo, tukashipikisha mu mulimo atutuma ukuti tubombe.
5 Yehova alasekelela ilyo amona aba cishinka bakwe baleshipikisha. Shi natulundeko ukusekelela kwakwe pa kutwalilila ‘ukwenda mu cine.’