Umukululo wa Fipusho

◼ Mulandu nshi cawamina ukuti ibumba lilekupukula Baibolo ku kubelenga amalembo lintu kalanda asose fyo?

Ifintu pamo nga umutwe wa lyashi kabili nampo nga lya kulanshanya kwa cikomo ne cikomo ice buuku lya mu Cebo ca kwa Lesa e fikapima ubwingi bwa malembo ibumba likebwa ukubelengela pamo na kalanda.

Calicindama ukwibukisha ukuti umulandu umo uwa kubelengela amalembo yamo waba wa kushinina ukuti icilesoswa calilembwa mu Baibolo. (Imil. 17:11) Imifwaile na imbi ya kumona ubushinino bwa mu Malembo ubwa kutungilila icilelandwa pa kuti icitetekelo ca bonse cikoshiwe. Ukumona ico Baibolo isosa ilyo ilembo likumineko sana lilebelengwa cili no kwafwa mu kumfwikisha sana icilelandwa. Ukusansha pa kukupukula amalembo, ukulemba ifyebo no kulakutikisha imipelulwile ya kwa kalanda kulafwa.

Ilyo autulaini wapekanishiwa na Sosaite kuti akwata Amalembo ayengi, yabikilwamo kalanda, ku kumwafwa ilyo alepekanya ilyashi. Nalimo kuti yalelanda pa fyashingulwikeko no kumwafwa ukumfwikisha ifishinte fikalamba ifya mu Malembo e lyo no kumfwikisha ifyo ifishinka fifwile ukulundululwa. Kalanda kuti apima amalembo engabelenga mu lyashi lyakwe no kweba ibumba ukubelenga capamo nankwe ilyo alebelenga ayo malembo no kuyalondolola. Amalembo yambi ayaletungilila ifyebo fyakwe napamo kuti ayalumbula nelyo alanda fye amashiwi yabapo, lelo te kuti cikabilwe ukweba ibumba ukukupukula amaBaibolo no kubelenga.

Ilyo kalanda abelenga amalembo, alingile ukubelenga ukufuma muli Baibolo, te kubelenga ayapulintwa ukufuma muli kompyuta. Ilyo kalanda aeba ibumba ukubelengela pamo nankwe, alalumbula bwino bwino ilembo alabelenga, icipandwa, ne cikomo nelyo ifikomo. Alapeelako ibumba inshita ya kusanga ilyo ilembo, ukupitila mu kupemwina ku kwipusha icipusho nelyo ukulandapo mu kwipifya pa mulandu ilembo lilebelengelwa. Ukubwekeshapo ukulumbula ilembo, icipandwa, ne cikomo na ko kukafwa ibumba ukwibukisha ilembo. Lelo, te cisuma ukulumbula ibula apalesangwa ilyo lembo, pantu amabula yalapusanapusana ukushintilila fye pa maBaibolo abali mwi bumba bakwete. Ukukupukula Baibolo ku kubelenga amalembo ilyo ibumba lyaebwa ukucite fyo kulafwa ibumba ukumwenamo mu maka ya Cebo ca kwa Lesa ilyo cilelondololwa mu lyashi.—Heb. 4:12.