Beni na Katiina Kuli Yehova Akasuba Konse
1 “Akatiina ka kuli Yehova e kutendeka kwa mano.” (Amalu. 111:10) Akatiina katucincisha ukucite milimo isuma kabili katwafwa ukutaluka ku fyabipa. (Amapi. 16:6) Aka katiina mucinshi ukalamba twakwatila Kabumba wesu, uutulenga ukuti tuletaluka ku kumukalifya nelyo ku kukanamumfwila. Cintu cimo ico tulingile ukulundulula no kulangilila akasuba konse.—Amapi. 8:13.
2 Cila bushiku, umupashi wa calo ca kwa Satana ulatutitikisha apakalamba ukuti tukonkelele inshila sha ciko ishabipa. (Efes. 6:11, 12) Umubili wesu uushapwililika wa lubembu kabili lyonse fye walemenena ku fyabipa. (Gal. 5:17) E co, pa kumfwila amafunde ya kwa Yehova, pa kuba aba nsansa, na pa kunonka umweo, tufwile ukuba na katiina kuli Yehova akasuba konse.—Amala. 10:12, 13.
3 Pa AbaHebere 10:24, 25, twakonkomeshiwa ukulongana capamo ku kuleka tukoseleshanye “pali bufi” muli ino nshita tuleikalamo. Ukulongana lyonse kwalikatama nga tuli no kupusuka ishi nshiku sha kulekelesha. Akatiina ka kukanafwaya ukukalifya Lesa katulenga ukusangwa ku kulongana no kukatamika nga nshi imifwaile ya kulongana. Abatiina Lesa bamona ukusangwa ku kulongana kwa Bwina Kristu ukuti lishuko lyashila.
4 Ukumfwila ifunde lya kushimikila imbila nsuma iya Bufumu ni nshila na imbi iya kulangilamo ukuti tulatiina Lesa. (Mat. 28:19, 20; Imil. 10:42) Ubuyo bukalamba ubwa mulimo wesu uwa kushimikila kwafwa bambi ukulundulula akatiina ka kuli Yehova no kunakila ukufwaya kwakwe. Tucite ci mu kubwelela ku balefwaya ukusambilile cine, ukutukuta ukutendeka amasambililo ya Baibolo aya pa ng’anda, no kusambilisha bambi amafunde ya kwa Lesa yonse. Kanshi e ico tulangilila ukuti tulatiina Yehova no kutemwa abanensu.—Mat. 22:37-39.
5 Abashitiina Lesa balafilwa ukukatamika ifya ku mupashi, kabili bakonkelela umwela wabipa uwa calo, nelyo imibele. (Efes. 2:2) Shi ukupingulapo kwesu kube kwa “kubombela Lesa umulimo washila mu katiina ka bukapepa.” (Heb. 12:28, NW) Na mu kulekelesha, tukapokelela amapaalo ya batiina Yehova akasuba konse.