Bushe Mushimikila no Kushipa?
1 Nangu ca kuti baleikatwa no kutiinishiwa ku balebalwisha, Petro na Yohane batwalilile ukubila ubukombe bwa Bufumu no kushipa. (Imil. 4:17, 21, 31) Ukushimikila mu kushipa lelo kupilibula nshi?
2 Ukushimika Ubunte no Kushipa: Ishiwi limbi ilipilibula “ukushipa” lyaba “kukosa,” ilyalola mu kuti “ukubulwa umwenso, ukushansha, no kushipikisha.” Ku Bena Kristu ba cine, ukushimikila no kushipa kupilibula ukukanaumfwa umwenso wa kulanda ilyo kwaba inshita yalinga iya kushimikila bambi imbila nsuma. (Imil. 4:20; 1 Pet. 3:15) Kupilibula ukuti tatwakwata nsoni sha kushimikila imbila nsuma. (Amalu. 119:46; Rom. 1:16; 2 Tim. 1:8) E co, ukushipa mibele ikabilwa ku kubombo mulimo wesu uwa kushimikila imbila nsuma iya Bufumu muli iyi nshita ya ku mpela. Kutulenga ukushimikila abantu imbila nsuma konse uko bengasangwa.—Imil. 4:29; 1 Kor. 9:23.
3 Ukushipa pa Sukulu: Bushe umwenso ulalenga calakukosela ukushimikila ku bana be sukulu banobe? Inshita shimo taciba icayanguka, na kuba, kuti caba bwafya ubwine bwine. Lelo, Yehova akakukosha nga wapepa ukuti akulenge ukuba uwashipa ku kushimikila bambi. (Amalu. 138:3) Ukushipa kukakwafwa ukuishibisha ukuti uli umo uwa Nte sha kwa Yehova kabili kukakwafwa ukushipikisha ukupumya. E co, ukushimikila pa sukulu kuti kwapususha abalekuumfwa.—1 Tim. 4:16.
4 Ukushipa pa Ncito: Bushe pa ncito mwaishibikwa ukuti muli umo uwa Nte sha kwa Yehova? Pambi inshila fye yeka abo mubomba na bo bengomfwilamo imbila nsuma kubashimikila imwe bene. Ukushipa kwenu kukamwafwa no kupokako ulusa lwa kuya mu kusangwa mu kulongana kwa Bwina Kristu na mabungano.
5 Ukushipa Ilyo Muleeshiwa: Ukushipa kwalikatama lintu baletulwisha. (1 Tes. 2:1, 2) Kutwafwa ukukakatila ku citetekelo cesu ilyo tuletiinishiwa, ukupumiwa, nelyo ukupakaswa. (Fil. 1:27, 28) Kulatukosha ku kukanatelententa ilyo tuletitikishiwa ukuti tunasheko ifipimo tukonka ifya kwa Lesa wesu, Yehova. Kulatukosha ukusungilila umutende wesu lintu bambi baimya ifikansa.—Rom. 12:18.
6 Nelyo tube na mafya yatuponena, natube no mupampamina wa kushimikila imbila nsuma mu kushipa.—Efes. 6:18-20.