Mwe Bafyashi—Fundeni Abana Benu Imibele Isuma

¹ Imibele isuma tatufyalwa na yo, nelyo ukuikwatila mu mankumanya. Nalyo line, ukufunda abana imibele isuma, kulasenda inshita. “Ukufunda” kupilibula “ukweba libili libili” nelyo “ukutoneshamo ifyebo panono panono.” Abafyashi balingile ukutwalilila pa kuti ‘bengalela [abana babo] mu kufunda no kukonkomesha kwa kwa Yehova.’—Efes. 6:4.

² Tendekeleni ku Bwaice: Amaka abana banono bakwata aya kusambilila no kucita ifintu ifipya yalasungusha. Nangu line cilafya sana ku bakalamba ukusambilila ululimi lupya, abana bashilatendeka isukulu kuti basambilila indimi shibili nelyo shitatu pa muku umo wine. Mwitila umwana wenu nacepesha te kuti alundulule imibele isuma. Nga ca kutila mwatendeka ukusambilisha umwana icine ca mu Baibolo ilyo acili umunono kabili mwatwalilila, pa nshita akakulako, umuntontonkanya wakwe ukesulamo sana ifyebo ifikamulenga ukuba na “mano ayalosha ku kupusuka.”—2 Tim. 3:15.

³ Babelesheni Umulimo wa mwi Bala: Imibele isuma abana balingile ukufundwa ilyo balekula yaba kushimikila imbila nsuma ya Bufumu bwa kwa Lesa lyonse. Abafyashi abengi batendeka ukucite ci ukupitila mu kusenda abana babo mu butumikishi bwa ku ng’anda ne ng’anda ilyo bacili fye abanono. Lintu abafyashi baleya lyonse mu mulimo wa kushimikila bafwilisha abana babo ukukatamika no kupimpila ubutumikishi. Abafyashi kuti balanga abana ifyo bengabombako ukucitilo bunte mu nshila shalekanalekana isha mulimo.

⁴ Ukulembesha mwi Sukulu lya Ubutumikishi bwa Teokrasi na ko kulafwa abana. Isukulu libasambilisha inshila shisuma isha kusomenamo no kubelenga pa kuti bengomfwikisha. Basambilila ifyo bengalanshanya ifyaba mu Baibolo, ifyo bengacita ifipempu fya kubwelelamo, no kutungulula amasambililo ya Baibolo. Ukukansha kwa musango yo kuti kwabakoselesha ukubombako bupainiya no kufika pa mashuko yaibela aya mulimo. Ababa pa Bethel abengi na bamishonari balebukisha ne nsansa inshiku shabo isha kubalilapo ilyo bali mwi Sukulu lya Butumikishi kabili balimona ukuti lyalibafwile ukulundulula imibele isuma.

⁵ Bonse twaba nge bumba mu minwe ya Mubumfi Mukalamba, Yehova. (Esa. 64:8) Ibumba nga lili ilyanaka, talyafya kubumba. Kabili nga lileuma panono panono, e lyo likosa sana. E fyo na bantu baba. Ilyo bacili abanono, baba abanakilila—kabili nga banono sana, balacilanapo. Imyaka yayafya ni ilya balekula, ilyo ukubamumunga kuba ukusuma nelyo ukubi. Pamo nga bafyashi basakamana, bangilileni ukufunda abana benu imibele isuma mu butumikishi bwa Bwina Kristu.