Beni Bakacita wa Nsansa
1 Yesu atile abantu abengi ‘tabakeshibe’ ukubapo kwakwe, nga filya fine cali mu nshiku sha kwa Noa. (Mat. 24:37-39) E co, tuleenekela ukuti abengi tabakakutike ku mbila nsuma iya Bufumu. Cinshi cingatwafwa ukutwalilila ukuba no buseko ilyo tulebomba ubutumikishi bwesu?—Amalu. 100:2.
2 Ica kubalilapo, tulingile ukulaibukisha ukuti ubukombe bwesu no mulimo wa kushimikila fyafuma kuli Lesa. Ukukaanayankulako ukuli konse uko tusanga mu butumikishi, te mulandu no kubombesha kwesu, cine cine kuba kukaana Yehova. Ukwibukisha ukuti ubusumino bwesu mu kushimikila bulamutemuna kukatwafwa ukutwalilila ukuba no buseko ne nsansa sha lwa nkati nga bakacita wa mulimo wa kwa Lesa.—Yako. 1:25.
3 Ica bubili, e ko bali na bambi abengapokelela inshila intu Yehova abikako iya kupusushishamo abantu. Nelyo ca kutila bambi te kuti bapooseko amano, kucili bamo abapala impaanga abafwile ukulonganikwa, na nomba line, mu kati na nkati ka nshita ya ku mpela. Tulingile ukutwalilila ukushimikila, ukuya “mu mushi ukalamba onse nalimo mu unono” ku ‘kufwayamo abayana.’—Mat. 10:11-13.
4 Twalilileni ne Mimwene Isuma: Ilyashi lyabipa ilyashimikwa pa lwa mipepele ya bufi lyalenga bamo ukuba ne nsoni. Bambi ‘balilulunkaniwa kabili balipaswa’ kuli buno bwikashi. (Mat. 9:36) Abengi napamo kuti bapelenganishiwa ku mulandu wa kubulwa incito, ukubulwa umuti mu fipatala, no mutelelwe. Ukutesekesha ifi fintu kukatwafwa ukutwalilila mu mulimo wesu. Natweshe ukutendeka ukulanshanya pa filesakamika sana abantu baba mu cifulo cesu ico tubombelamo. Bafweni ukumona ukuti Ubufumu bwa kwa Lesa e bukapwisha ayo mafya. Bomfyeni Amalembo ne fishinka fya kulungatika ifili mu mpapulo pa kuti imbila nsuma ifike pa mitima yabo.—Heb. 4:12.
5 Bakacita wa cebo ca kwa Lesa aba nsansa lyonse bebukisha ukuti: “Ukusekelela muli Yehova e maka [yesu].” (Nehe. 8:10) Tatufwile ukulufya ukusekelela kwesu. “Nga ni ng’anda iyayana, lekeni umutende wenu wisemo; lelo nga taiyene, lekeni umutende wenu ubwelele kuli imwe.” (Mat. 10:13) Yehova abukulula ubuseko bwesu na maka lintu mu kutekanya tuleshipikisha mu mulimo wakwe uwashila, kabili alapaala no busumino bwesu.