Yehova Alakosha
1 Kuti mwatilapo shani pa mutumwa Paulo? Ilyo tulebelenga ibuuku lya Imilimo, tutesekesha ifyo atukwite mu mulimo wa kwa Yehova. Cinshi calengele ukuti Paulo acite fyonse ifyo acitile? Atile: “Ndi na maka aya kucite fintu fyonse mu ulenkoselesha.” (Fil. 4:13) Na ifwe bene kuti twakoshiwa ku maka ayo Yehova apeela. Kuti twakoshiwa shani? Nga twashukila ifintu 6 ifyo aatupeela ifitucincisha no kutukoselesha lwa ku mupashi.
2 Icebo ca kwa Lesa: Nga filya fine tulya ifya kulya pa kuti umubili wesu utwalilile uwa maka, tufwile ukulya Icebo ca kwa Lesa pa kuti tutwalilile aba mweo lwa ku mupashi. (Mat. 4:4) Muli Baibolo e mwaba amaka ayengalenga ukuti tutwalilile. Pa kutwalilila abapimpa kabili abacincila mu cine, tufwile ukukwata isambililo lya pa lwesu ilyalondoloka no kwetetula pa fyo tulesambilila, ukweshako ukulacite co cila bushiku.—Amalu. 1:2, 3.
3 Ipepo: Ukupalama kuli Yehova kwalicindama, na kucilisha lilya tulekabila sana ukukoseleshiwa. Ukupitila mu mupashi wakwe, alapeela amaka ku bayalomba mwi pepo. (Luka 11:13; Efes. 3:16) Amalembo yatukoselesha ukuba no ‘mukoosha ku kupepa.’ (Rom. 12:12) Bushe muli ba mukoosha ku kupepa?
4 Icilonganino: Ukulongana kwa cilonganino kulatukosha no kutucincisha. Ukubishanya kusuma na bamunyinefwe ne nkashi shesu uko tuipakisha ilyo tuli ku kulongana na ko kwine kulatukosha no kutucincisha. (Heb. 10:24, 25) Ilyo twaba na mafya, bamunyinefwe balatukoselesha no kutwafwa pantu balitutemwa.—Amapi. 17:17; Luk. Mil. 4:10.
5 Ubutumikishi Bwa Mwi Bala: Ukubombako lyonse mu butumikishi kutwafwa ukutontomesha pa fya Bufumu na mapaalo ya buko. Tulomfwa bwino ilyo twafwa bambi ukusambilila pa lwa kwa Yehova. (Imil. 20:35) Te bonse pali ifwe abengaya mu kubombela ukuli ukukabila kukalamba kabili te bonse bengabombako umulimo wa nshita yonse, lelo bonse kuti twabombako mu butumikishi ukulingana na papela amaka yesu.—Heb. 6:10-12.
6 Bakangalila ba Bwina Kristu: Tulamwenamo ilyo baeluda batukoselesha no kutwafwa. Yehova abapeela umulimo wa kucema umukuni wa kwa Lesa uo aabeba ukusakamana. (1 Pet. 5:2) Bakangalila abenda balakoselesha ifilonganino batandalila, nga filya fyalecita Paulo mu nshiku shakwe.—Rom. 1:11, 12.
7 Ifya Kumwenako fya ba Citetekelo: Kuti twakoseleshiwa nga twatontonkanya pa fya kumwenako fisuma ifya babomfi banensu aba citetekelo, aba ku kale na ba muno nshiku. (Heb. 12:1) Ilyo mwakabila ukukoseleshiwa, bushe te kuti ciwame mwabelenga amalyashi ya bumi ayo bamunyinefwe bashimika muli bamagazini besu, nelyo nga mulabelenga no kumfwa iciNgeleshi bushe te kuti ciwame ukubelenga ilyashi lya muli Yearbook nelyo amalyashi yamo aya kucincimusha pa fyacitika ku Nte sha kwa Yehova muno nshiku mu citabo ca Proclaimers?
8 Munyinefwe umo, uuli nomba ne myaka ya pa kati ka ba 90, apokelele icine ilyo aali fye umulumendo. Ilyo line, icitetekelo cakwe calyeshiwe. Ica kubalilapo, bamo abo alelongana na bo mu cilonganino abaali abacincila bafumine mu kuteyanya kwa kwa Yehova. Ica bubili cali mulimo wa ku ng’anda ne ng’anda uo ashatemenwe ukubomba. Nangu cali fyo, atwalilile ukushintilila pali Yehova. Bwangu bwangu atendeke ukuipakisha ubutumikishi. Nga lelo aba kwi? Nangu ca kuti alalwalilila, acili mu lupwa lwa Bethel ulwa ku Brooklyn kabili aba mwi Bumba Litungulula. Tasangamo ububi nelyo fye bumo mu kulambatila ku kuteyanya kwa kwa Yehova.
9 Nkashi yesu uwaba mu lupwa lwa Bethel ku Britain abatishiwe ilyo aali ne myaka 13. Umwaka wakonkelepo, atendeke ukubomba bupainiya pamo na ndume yakwe, kabili ilyo papitile umwaka na umbi, bawishi bapooselwe mu cifungo pantu balikeene ukuitumpa mu mapolitiki ya mu Nkondo ya Calo iya Cibili. Atwalilile ukushintilila pali Yehova ku kumukosha kabili akonkenyepo ukubombela Lesa wa cine. Umuye nshiku, aupilwe kuli munyinefwe wa citetekelo, kabili batwalilile ukucita ukufwaya kwa kwa Yehova capamo. Ilyo baikele imyaka 35 mu cupo, umulume wakwe alifwile imfwa ya kupumikisha fye. Na pali uyu wine muku, akoshiwe na Yehova no kutwalilila ukumubombela ukufika na lelo, acili alefwaisha ukutwalilila ukubombela Yehova mu lupwa lwakwe ulwa pano isonde umuyayaya.
10 Yehova alafwa no kukoselesha ababomfi bakwe aba citetekelo. “Apeela amaka ku wapomponteka, no kufusho kucincila ku ushakosoboka.” Kuti twakoshiwako na ifwe kuli ayo maka yashaifulila, kulila twashukila ifintu 6 ifyo twalanda muli cino cipande. Mwilaba ukuti: “Abalolela Yehova bapepemuka amaka, . . . babutuka no kukanafunshika, benda no kukanapomponteka.” (Esa. 40:29-31) Paulo ashintilile sana pali Yehova ku kumukosha, na ifwe bene e fyo tufwile ukucita.