“Kuli Lesa Fyonse Fingacitwa”
1 Umulimo ukalamba uwa cilonganino ca Bwina Kristu kushimikila ubukombe bwa Bufumu mwi sonde lyonse. (Mat. 24:14) Uyu mulimo ushaikulila. Abengi bamona ukuti uyu mulimo ukabila ifintu ifyacila pa fyo twakwata. Bambi bamona kwati ukufishapo uyu mulimo cintu cishingacitika pa mulandu wa kuti balatupumya, balatukaanya, no kutupakasa. (Mat. 24:9; 2 Tim. 3:12) Abalengulula balishininwa ukuti uyu mulimo cintu icishingacitwa. Lelo, Yesu atile: “Kuli Lesa fyonse fingacitwa.”—Mat. 19:26.
2 Ifya Kumwenako Fisuma Ifya Kupashanya: Yesu atendeke ubutumikishi bwakwe e ka fye ukushimikila mu calo. Ku kwesha ukumulesha ukutunguluka, abalemukaanya bamusaalwile icabipisha, kabili basukile bamulenga afwa imfwa mbi. Lelo, kuli pele pele, Yesu mu kushininkisha atile: “Ine nincimfya aba pano isonde.” (Yoh. 16:33) Mwandi kwali kupwishishisha umulimo mu nshila ya cipesha mano!
3 Abasambi ba kwa Yesu na bo e fyo bashipile no kupimpa mu butumikishi bwa Bwina Kristu. Abengi balifopawilwe, ukupumwa, ukubikwa mu cifungo, no kwipaiwa. Lelo, “balesekelela, ico balingilwe abawamino kucendelwa Ishina.” (Imil. 5:41) Nelyo babalwishishe, babombele umulimo walemoneka ukuti te kuti ubombwe uwa kushimikila imbila nsuma “ukufika ku mpela ya pano nse.”—Imil. 1:8; Kol. 1:23.
4 Ifyo Twingabomba Bwino mu Nshiku Shesu: Na ifwe tubomba umulimo wa kushimikila pa lwa Bufumu no kupimpa nelyo kwaba ifilenga umoneke nga uushingabombwa. Te mulandu ne fibindo, ukupakaswa, ukukakwa, no kucushiwa mu nshila shimbi pa kuti batuleshe, tulebomba bwino. Cinshi cilelenga ukuti tulebomba bwino? “Te ku bulamba, kabili te ku maka, kano ku Mupashi wandi, e fyo asosa Yehova wa milalo.” (Seka. 4:6) Apo Yehova aletwafwa, takuli icingalesha umulimo wesu!—Rom. 8:31.
5 Lintu tuleshimikila, tapali umulandu wa kubela no mwenso nelyo ukuyumfwa ukuti tatwafikapo. (2 Kor. 2:16, 17) Twalikwata imilandu ikalamba iya kutwalilila ukusalanganya imbila nsuma iya Bufumu. Ukwafwa kwa kwa Yehova, kukatulenga ukubomba “ifishingacitwa”!—Luka 18:27.