Ipekanyeni Ukusambilila Ukusesema kwa kwa Esaya!
1 “Bakapepa ba busumino kuti bacetekela ukuti Yehova . . . takaleke icalo ca kwa Satana ukupulamo nangu fye ubushiku bumo pa numa ya kupingulwa.” Kwena ayo mashiwi yaumfwika bwino sana! Ni kwi yafumine? Ni mu citabo ca Ukusesema kwa kwa Esaya—Ulubuuto lwa Bantu Bonse 1. Bushe ukusesema kwa kwa Esaya kulatweba fimo ifilenga ukuti tulande amashiwi ya musango yo aya kukoselesha? Ee! Ili buuku lya mu Baibolo, lyalilanda bwino bwino ukuti kukaba ukupusuka. (Esa. 25:9) E mulandu wine tukakoseleshiwa nga nshi pa kusambilila ili buuku lya mu Cebo ca kwa Lesa pe Sambililo lya Citabo Ilya pa Cilonganino. Bushe twakulasangwako cila mulungu ku kuipakisha ici citabo? Mulandu nshi tufwile ukusangilwako?
2 Esaya 30:20 yalanda ukuti Yehova ni “Kasambilisha” wesu. Umwina Kristu onse afwile ukukutikisha ilyo Yehova alelanda kuli ifwe mu Cebo cakwe na mu mpapulo sha Baibolo ishilembwa no “musha wa cishinka kabili uwashilimuka.” (Mat. 24:45; Esa. 48:17, 18) E fyo tufwile ukukutika na ku fili mu citabo ca Ukusesema kwa kwa Esaya 1. Kuti mwacita shani pa kuti mukomfwikishe sana ifishinka pa kusambilila ici citabo?
3 Pekanyeni Ukwasukapo: Cila mulungu, paatuleniko inshita yalinga iya kupekanya isambililo lya citabo. Belengeni amaparagrafu yonse ayalesambililwa uyo mulungu. Tontonkanyeni pa cipusho cimo cimo. Shileni ifyasuko mu citabo cenu. Ifikomo ifyayambulwa muli Esaya fyalembwa mu filembo fyafiita. Belengeni ifi fikomo mu muteekatima. Kumfwa ku malembo yambi ayalimo, yabelengeni muli Baibolo pa kuti mwishibe ifyo yakumine ifyebo filelandwapo. Etetuleni pa fyo mulesambilila. Lyena asukenipo pa kuti abo mwaba na bo pe sambililo lya citabo bomfweko ifyo mwapekenye.
4 Munyinefwe uuletungulula isambililo lya citabo afwile ukwafwa bonse abasangilweko ukubomfya bwino Baibolo no kumfwikisha ubucindami bwa fyebo filesambililwa ne fyo fingabomfiwa. Nga bamusonta intanshi ukwasukapo, asukeni icasuko icayanguka, ica kulungatika. Nga ca kutila umo nayasukapo kale, kuti mwalandako na fimbi ifilekosha icishinka cilelandwapo. Nalimo kuti mwalanda pa fyo ilembo lilimo icishinka cikalamba lilelanda pa fikumine umutwe wa lyashi mulesambilila. Esheniko ukwasuka mu mashiwi yenu, kabili ipakisheni insansa shaba mu kwasukapo pe sambililo.
5 Kanshi bonse natupooseko amano pa kusambilila ubukombe bwacindama ubwa mwi buuku lya kwa Esaya. Likatukoselesha ukuti cila bushiku ilyo tuli no mweo tulefuluka ipusukilo lya kulengo kusekelela ukufuma kuli Yehova!—Esa. 30:18.