Bushe Kuti Mwayabombela Ukuli Ukukabila?
1 Bushe mwalitontonkanyapo pa kuya mu kubombela ukulekabilwa bakabilisha ba Bufumu abengi? Nga bamweba ‘ukwabukila . . . ku kwafwa,’ bushe kuti mwayasuka nge fyayaswike umutumwa Paulo? (Imil. 16:9, 10) Mu filonganino ifingi, mulekabilwa indupwa shakosoka lwa ku mupashi nelyo bapainiya abengabombesha ukupwisha icifulo ca kubombelamo. Mumbi na mo mulekabilwa baeluda nelyo ababomfi batumikila abafikapo abakwafwilishako ukutungulula. Mu ncende sha mu mishi, icifulo ca kubombelamo limo cikwata utumishi utwatalukana nga nshi. Ing’anda ya Bufumu iyabela kuli yo ncende nalimo kuti yabela ukutali sana. Takuba ne ncito ya ku calo iyo umuntu engengila. Imiceele nalimo te kuti ibe iisuma lyonse. Bushe kuti mwaitemenwa ukubombela ukwa musango yo te mulandu na mafya? Kuti mwakumanisha shani ukubomba?
2 Icitetekelo no Kucetekela Filakabilwa: Ilyo Lesa amwebele, Abramu afumine mu mushi wa ku mwabo uwa Uri no kwenda bakilomita 1,000 ukuya ku Harani pamo no mukashi, umwana wa mukalamba wakwe, na wishi umukote, Tera. (Ukute. 11:31, 32; Nehe. 9:7) Ilyo Tera afwile, Yehova aebele Abramu, uwali ne myaka 75, ukufuma mu Harani no kusha abantu bakwe ukuya ku calo ico Lesa aali no kumulanga. Abramu, Sarai, na Lote ‘balifumine no kuya.’ (Ukute. 12:1, 4, 5) Kwena, Abramu ico akuukile te kuya mu kubombela ukwalekabilwa bakashimikila. Lelo pa kuti akuuke alekabila fimo. Ni finshi fyo?
3 Abramu alekabila icitetekelo no kucetekela pa kuti akuuke. Ukutontonkanya kwakwe no musango wa mikalile fyali no kwaluka. Aali no kusha ulupwa lwakwe. Lelo acetekele Yehova ukuti akamusakamana pamo na ba mu ng’anda yakwe. Abengi na lelo balicetekela Yehova mu musango umo wine.
4 Ukuyabombelako pa Nshita Inono: Bushe mwalyumfwa ifyo amapaalo yaba mu kubombela mu fifulo fishibombelwamo ilingi yawama? Bamo pa kuti fye bacite co, balyendele intamfu yalepa. Bushe baicushishe fye?
5 Pa bushiku bwa kubalilapo ukuya mu mulimo wa mwi bala ku cifulo cishibombelwamo ilingi apaba bakilomita 80 ukufuma mu Lusaka, abaupana bakumenye umukote uwafwilwa abena mwakwe uwa myaka nalimo 80. Batendeke ukusambilila nankwe muli broshuwa wa Cintu Lesa Afwaya kabili atendeke ukulunduluka bwino. Ilyo bapwile ukusambilila isambililo 10 ilya mutwe wa kuti “Ifibelesho Ifyo Lesa Apata” ulya muntu alyumfwile ukuti afwile ukwalula imikalile yakwe pantu aali ni kapeepa kabili aleshitisha na fwaka pa ng’anda pa mwakwe. Munyinefwe ashimika ukuti: “Ifyebo namubelengele fyalimufikile pa mutima. Bushe kuti mwaishiba ico acitile? . . . Alindoleshe no kwipusha ati: ‘Kuti nacita shani pa kuti nkaleke ukupeepa fwaka?’ Twamukoseleshe ukulapepa kuli Yehova cila bushiku pa kuti amwafwe. Nangu ca kutila ilyo baleyako ku kutungulula isambililo balesanga ukuti ulya mukote taleumfwa bwino, na o alekosapo fye ati: “Napaapaata na lelo nsambilisheniko fye na tumbi pali paradise wa pe sonde.” Ilyo balya abaupana babwelelemo ku cilonganino ku mwabo, ulya mukote atwalilile ukulunduluka. Alekele ukuya ku calici aleyako kale, alekele ukupeepa, alekele no kushitisha fwaka. Icabipileko fye kwena ca kutila alishele alwala no kufwa, lelo umulimo wa balya baupana washele uletwala ifisabo pantu balupwa lwa ulya muntu batendeke ukusambilila Baibolo. Umwana wakwe umwanakashi na o wine ashele atendeka ukusambilila Baibolo. Bakasabankanya abengi kuti basumina ukuti ukubombela ukuli ukukabila, nangu fye pa kashita akanono, kwalilenga bene ukutemwa nga nshi umulimo wa kushimikila. Landeni na babombelako ukwali ukukabila. Bakamweba ukuti balikoseleshiwe lwa ku mupashi kabili kuti batemwa ukuya na kabili nga bakwata ishuko.
6 Ukuyabombela ukuli ukukabila pa nshita inono kuti kwalenga umuntu acita icintu na cimbi. Abacite co kuti baishiba bwino ico cifulo pa kuti bamona bwino ifyo ‘bengalinga ishingapooswapo’ pa kuti bakakuukile ku ncende imbi.—Luka 14:28.
7 Ukukuukila Ukuli Ukukabila: Yehova alefwaisha ukuti imbila nsuma ibilwe “ku fyalo fyonse” ilyo impela ishilaisa. (Mat. 24:14) Apo mwalishibe fyo, nga kuti mwakumanisha, bushe kuti mwatemwa ukukuukila ukuli ukukabila? Umuli ukukabila mwingi.
8 Bushe mwalipoka penshoni? Bushe mwalikwatako inshila imo iyo musangilamo indalama? Nga tamwakwata, bushe kuti mwafwayako incito imo iya kuibombela fye mwe bene? Bushe kuti mwaikala ku cifulo cimbi nga mwayabelesha imikalile ya kulya kwine? Nga te kuti mukuuke, bushe kuti mwayafwa uwa mu ng’anda mu mwenu ukuyabombela kumbi?
9 Nga ca kutila pa numa ya kutontonkanyapo no kupepa mwasanga ukuti kuti mwakumanisha ukukuukila ukuli ukukabila, lanshanyeni ilyo lyashi na ba pa ng’anda pa mwenu na baeluda ba mu cilonganino cenu. Lyena lembeni kalata no kupeela baeluda pa kuti na bo balembeko ifyo balemona pamo pene no kutasha kwabo kabili bakatuma ku maofeshi ya Sosaite.
10 Finshi mufwile ukulemba muli kalata? Lembeni imyaka mukwete, ubushiku mwabatishiwe, ifishingamo fya mu cilonganino, landeni nga mwalyupa, nga mwalyupwa nangu muli bashimbe, nelyo nga mwalikwata abana abanono. Landeni icilonganino mulefwaya ukuyabombelako, ukulingana no ko mwe bene mulemona ukuti e ko mwingakumanisha ukwikala.
11 Nga ca kutila kasabankanya alefwaya ukukuukila ku cilonganino icangalilwa na maofeshi ya Sosaite aya ku calo cimbi, Komiti wa Mulimo uwa Cilonganino akatuma kalata wenu pamo na kalata wabo uwa kutasha ku maofeshi ya Sosaite aya mu calo icangalila ico cilonganino. Amaadresi ya maofeshi ya Sosaite kuti yasangwa pe bula lya kulekelesha ilya Yearbook wa nomba line.
12 Bushe mwalipimpa kabili kuti mwaitendekelako? Bushe kuti mwakumanisha ukubombela ukuli ukukabila? Nga e fyo, imweneni ifyo Yehova atwalilila ukufumfumwina amapaalo pa bamucetekela ilyo balelanga umupashi wa kuipusula!—Amalu. 34:8; Mal. 3:10.