Bilisheni Ubukombe bwa Bufumu
1 “Ndi no kubila imbila nsuma iya bufumu bwa kwa Lesa. . . , pa kuti e co natuminwa.” (Luka 4:43) Aya mashiwi yalangile ico Yesu alelandapo mu butumikishi bwakwe, ne co cali Bufumu bwa kwa Lesa. Ubukombe tubilisha ilelo, na bo bulanda pa Bufumu, nga fintu casobelwe pali Mateo 24:14 ati: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” Fishinka nshi pa lwa Bufumu bwa kwa Lesa ifyo abantu bafwile ukuumfwa?
2 Ubufumu bwa kwa Lesa nomba buleteka mu muulu kabili nomba line bukapyana pa mitekele ya bantunse. Kaseebanya kale kale alitamfiwa ukufuma ku muulu, kabili na buno bwikashi bwabipa bwalingila mu nshiku sha kulekelesha. (Ukus. 12:10, 12) Ubwikashi bwa kwa Satana ubwabipa kabili ubwa kale bukonaulwa umupwilapo, lelo, Ubufumu bwa kwa Lesa tabwakatenshiwe. Bukateka ku ciyayaya.—Dan. 2:44; Heb. 12:28.
3 Ubufumu bukapeela abantunse bacumfwila bonse ifisuma fyonse ifyo bafwaisha. Bukapwisha ukucula ukwaletwa ne nkondo, imisoka, ulumanimani, ne cipowe. (Amalu. 46: 8, 9; 72:12-14) Bonse bakakwata ifya kulya ifingi. (Amalu. 72:16; Esa. 25:6) Amalwele no kulemana tafyakebukishiwe. (Esa. 33:24; 35:5, 6) Ilyo abantunse bakafika ku kupwililika, isonde likasangulwa paradise, kabili abantu bakekala pamo mu cumfwano.—Esa. 11:6-9.
4 Tulanga ukuti tulafwaya ukutekwa no Bufumu bwa kwa Lesa ku mikalile yesu pali nomba. Ubukombe bwa Bufumu bufwile ukukuma imikalile yesu, ukusanshako na mabuyo yesu ne fyo twacindamika. Ku ca kumwenako, nangu line twalikwata umulimo wa kupekanisha ulupwa lwesu umwa kulila, ukwangwa ifya ku mubili takufwile ukulenga twafilwa ukubomba imilimo ya Bufumu. (Mat. 13:22; 1 Tim. 5:8) Lelo, tufwile ukuumfwila ukukonkomesha kwa kwa Yesu ukwa kuti: “Mubale mufwaye ubufumu bwa kwa Lesa no bulungami bwakwe, ne fi fyonse [ifikabilwa mu mikalile] fikalundwako kuli imwe.”—Mat. 6:33.
5 Abantu bafwile ukuumfwa ubukombe bwa Bufumu no kucitapo cimo mu kwangufyanya ilyo kucili nshita. Shi natubafwe ukucite co pa “kubanashanasha ulwa fya bufumu bwa kwa Lesa.”—Imil. 19:8.