Ukwikala Umwabela Ukuipeela Kwesu
1 Nampo mwabatishiwe nomba line nelyo kale sana, mufwile mulebukisha ico cintu cacindama mu bumi bwenu. Ulubatisho lwesu te mpela, lelo e kutendeka kwa bumi bwa kuipeela mu mulimo wingatwalilila ku ciyayaya. (1 Yoh. 2:17) Ukwikala umwabela ukuipeela kwesu kusanshamo finshi?
2 Konkeni ica Kumwenako ca kwa Kristu: Ilyo abatishiwe, Yesu “atendeke ukusambilisha,” ukubila “imbila nsuma iya bufumu bwa kwa Lesa.” (Luka 3:23; 4:43) Na ifwe bene, lintu twalangisha ukuipeela kwesu ukupitila mu lubatisho, tuba abatumikishi basontwa aba mbila nsuma. Ilyo kuti cakabila inshita ikalamba no kubombesha ukukwata ifyo tukabila mu bumi, umulimo wesu uukalamba, butumikishi bwa Bwina Kristu. (Mat. 6:33) Ukucila ukutukuta ukunonka ifyuma nelyo ubusambashi, abaipeela kuli Lesa bafwaya ‘ukucindika bukapyunga bwabo,’ nga fintu umutumwa Paulo acitile. (Rom. 11:13) Bushe mwalikatamika ishuko mwakwata ilya kubombela Yehova no kubomba ukulingana na po mwingapesha?
3 Nga fintu cali kuli Yesu, tufwile ‘ukukaana Kaseebanya.’ (Yako. 4:7) Satana aeseshe Yesu ilyo Abatishiwe, kabili na lelo esha ababomfi ba kwa Yehova abaipeela. (Luka 4:1-13) Apo twaba mu calo ca kwa Satana, tufwile ukuisalapula, ukutaluka kuli conse icingakowesha umuntontonkanya wesu nelyo umutima. (Amapi. 4:23; Mat. 5:29, 30) Abena Kristu bafundwa ukuti ‘tabengaliila pe tebulo lya kwa Yehova ne tebulo lya fibanda.’ (1 Kor. 10:21) Pa kucite ifi tukabila ukuibaka ku mangalo yabipa, ukubishanya kubi, ne fintu fyabipa ifyaba pa Intaneti. Kabili tukabila no kuibaka ku fyebo fya busangu. Ukuba abaibukila ulwa ifi ne micenjelo imbi iya kwa Satana kukatwafwa ukwikala umwabela ukuipeela kwesu.
4 Bomfyeni Ifyo Lesa Ateyanya: Ku kutwafwa ukwikala umwabela ukuipeela kwesu, Yehova alipeela ubwafwilisho ukupitila mu Cebo cakwe ne cilonganino ca Bwina Kristu. Cila bushiku mulebelenga Baibolo no kupepa kuli Yehova. (Yosh. 1:8; 1 Tes. 5:17) Bekelweni mu kulongana kwa pa cilonganino. (Amalu. 122:1) Bishanyeni na batiina Yehova kabili ababaka amafunde yakwe.—Amalu. 119:63.
5 Ku bwafwilisho bwa kwa Lesa kuti mwaikala umwabela ukuipeela kwenu kuli wene no kukwata ubuseko bwa kumubombela ku ciyayaya.—Amalu. 22:26, 27; Fil. 4:13.