Sambilisheni Bambi Ululimi Lwine Lwine
1 Nangu bafuma mu ‘nko ishingi, imitundu na bantu na bantu ne ndimi,’ Inte sha kwa Yehova bantu baikatana, abakwata ubwananyina bwa mwi sonde lyonse ubwa cine. (Ukus. 7:9) Muli cino calo ca malekano, ici cintu ca kupapusha. Bushe ici kuti cacitika shani? Ni pa mulandu wa kuti ululimi lwesu ‘lwalyalulwa no kubo lulimi lwine lwine.’—Seka. 3:9.
2 Ifintu Fishaiwamina Ififumamo: Bushe ululimi lwine lwine e cinshi? Lwaba kumfwikisha bwino icine cisangwa mu Cebo ca kwa Lesa pali Yehova no bufwayo bwakwe, sana sana icine pa Bufumu bwa kwa Lesa. Nge fyo Yesu asobele, ici cine cilesabankanishiwa ukupitila mu mitantikile ya pe sonde iimoneka, e kuti “umusha wa cishinka kabili uwashilimuka,” kabili ici cilelenga abantu “aba mu nko sha ndimi shonse” ukupokelela ukupepa kwa cine.–Mat. 24:45; Seka. 8:23.
3 Ilyo abantu balesambilila ululimi lwine lwine, balengwa ukwikala umwabela ifipimo fya kwa Yehova. Basambilila ‘ukwikatana bwino bwino mu mano yamo yene na mu kutontonkanya kumo kwine.’ (1 Kor. 1:10) Na kabili ukusambilisha kwa kwa Lesa kulenga baba ne micitile yatambalala ne milandile isuma kabili iya cine, sana sana ukukuma ku kweba bambi imbila nsuma. (Tito 2:7, 8; Heb. 13:15) Uku kwaluka kushaiwamina kuleta ilumbo kuli Yehova.
4 Ku ca kumwenako, umwaume uwaumfwile imbila nsuma alikwete ifipusho ifingi, ifyasuko fyonse ifyo bamwaswike fyafumine muli Baibolo. Pa kukoseleshiwa ku fyo aumfwile, atendeke ukusambilila imiku ibili mu mulungu no kulasangwa ku kulongana. Alisungwike pa fyo bamusekelele cisuma cisuma pa Ng’anda ya Bufumu, apo abengi abali kulya bali ba mu mutundu umbi. Mu nshita fye inono, wene no mwina mwakwe balyalwile imikalile yabo no kubatishiwa. Ukutule lyo alyafwilisha abantu bambi nalimo 40 ukubombela Yehova, ukubikako na balupwa abengi. Te mulandu no bulema, nomba line atendeke ukubomba bupainiya.
5 Ukusambilisha Bambi: Ifilecitika mu calo filelenga abantu abengi abafumacumi ukupituluka mu fyo batontonkanya na pa bwikalo bwabo. Nga filya Yesu alecita, tufwile ukufwaya ukubafwa. Ukubwelela ku balefwaya ukusambilila e lyo na masambililo ya Baibolo ni nshila ikalamba iya kwafwilamo abafumaluka ukusambilila ululimi lwine lwine.
6 Inshila imo iyabomba bwino sana ku bantu abapamfiwa kutungulula isambililo lya Baibolo ilipi pa mwinshi wabo wine. (km 5/02 ibu. 1) Bushe mwalyesha ukucite ci? Ilyo mulepekanya ukubwelela ku balefwaya ukusambilila, saleni ifyebo ifingalinga uyo mwine wa ng’anda ifili mu ca mu kati ca Ubutumikishi Bwesu Ubwa Bufumu ubwa January 2002. Ifya kulanda ifingi ifyaba muli ici ca mu kati fyalembelwe pa kuti kwingaba ukulanshanya mu kulungatika muli broshuwa wa Cintu Lesa Afwaya nelyo icitabo ca Ukwishiba. Pitenimo mu fya kulanda pa kuti mwingekatanya bwino ifyo mwalabalilapo ukulanda ne fili mu paragrafu imo. Saleni ilembo limo atemwa yabili mu paragrafu aya kubelenga no kulanshanyapo, kabili pekanyeni icipusho ca kusondwelela ukulanshanya. Ico cikamwafwa ukwisatendeka ukulanshanya muli paragrafu ikonkelepo ilyo mukabwelelako.
7 Abantu ba kwa Yehova nabakwata amapaalo ayengi pa mulandu wa kusambilila ululimi lwine lwine. Natubombeshe ukwafwa bambi ukuilunda kuli ifwe mu ‘kulilila kwi shina lya kwa Yehova’ na mu ‘kumubombela no mutima umo.’—Sefa. 3:9.