Ukwishibisha Ishina lya kwa Lesa
1. Bushe ukwishiba ishina lya kwa Lesa kuti kwakuma shani abantu?
1 Bushe mwacitile shani ilyo mwaishibe ishina lya kwa Lesa? Abengi bacita nge fyacitile umwanakashi umo uwatile: “Ilyo namwene ishina lya kwa Lesa umuku wa kubalilapo mu Baibolo, nalililile. Calimfikile pa mutima pa kwishiba ukuti kuti naishiba ishina lya kwa Lesa no kulilumbula.” Kuli uyu mwanakashi, ukwishiba ishina lya kwa Lesa cali cintu cacindama nga nshi ku kwishiba Yehova ukuti muntu no kuba na bucibusa na wene.
2. Mulandu nshi cipamfishe ukuti tusambilisha bambi pali Yehova?
2 Mulandu Nshi uwa Kwishibisha Ili Shina? Ishina lya kwa Lesa lisanshamo imibele yakwe, ubufwayo bwakwe, ne micitile yakwe. Lisanshamo ne pusukilo. Umutumwa Paulo alembele ati: “Onse uwalilila kwi shina lya kwa Yehova akapusuka.” Lelo Paulo apelulwile ati, “bakalilila shani [kuli Yehova]” ilyo bashilaumfwa pali wene no kumutetekela? Kanshi nacipamfya ukuti Abena Kristu beshibishe abantu bambi ishina lya kwa Lesa na fyonse ifyasanshiwamo. (Rom. 10:13, 14) Lelo, kwaba umulandu uukalamba uo ishina lya kwa Lesa lilingile ukwishibishiwa.
3. Mulandu nshi ukalamba tushimikilila?
3 Muli ba1920, abantu ba kwa Lesa balilwike ukufuma mu Malembo ukuti kwaba ifikansa fisanshamo ukwebelwa kwa bumulopwe bwa kwa Lesa no kushishiwa kwe shina lyakwe. Ilyo Yehova ashilaonaula ababifi no kufumyapo museebanya watuulikwa pe shina lyakwe, icine pali wene cifwile “ciishibikwe pano isonde ponse.” (Esa. 12:4, 5; Esek. 38:23) Kanshi, umulandu ukalamba tushimikilila waba wa kulumbanya Yehova ku cintubwingi no kushisha ishina lyakwe pa ntanshi ya bantunse bonse. (Heb. 13:15) Ukutemwa Lesa na banensu kukatulenga ukubombesha muli uyu mulimo uo Lesa aatutuma.
4. Bushe abantu bampanya shani Inte sha kwa Yehova ne shina lya kwa Lesa?
4 “Abantu abe Shina Lyakwe”: Mu 1931 twabuulile ishina lya Inte sha kwa Yehova. (Esa. 43:10) Ukutula ilya nshita, abantu ba kwa Lesa balishibisha ishina lyakwe konse konse ica kuti icitabo ca Proclaimers, pe bula 124, cisoso kuti: “Mwi sonde lyonse, onse uulumbula ishina Yehova ukwabula ubwafya bwangu bwangu eshibikwa ati ni Nte ya kwa Yehova.” Bushe e fyo na imwe mwaishibikwa? Ukutasha pa busuma bwa kwa Yehova kulingile ukutulenga ‘ukucindika ishina lyakwe,’ ukulanda pali wene pa nshita yonse iyalinga.—Amalu. 20:7; 145:1, 2, 7.
5. Bushe imyendele yesu yasanshiwamo shani mu kusenda ishina lya kwa Lesa?
5 Apo twaba “abantu abe shina lyakwe,” tufwile ukutungilila ifipimo fyakwe. (Imil. 15:14; 2 Tim. 2:19) Ilingi line ico abantu babalilapo ukumona pa Nte sha kwa Yehova myendele yabo iisuma. (1 Pet. 2:12) Tatufwile nangu panono ukufwaya ukusaalula ishina lyakwe ukupitila mu kutoba ifishinte fya bukapepa kabili tatufwile ukuleka ukupepa ukusanguka icintu cishacindamisha mu mikalile yesu. (Lebi 22:31, 32; Mal. 1:6-8, 12-14) Lelo, shi imikalile yesu ilelanga ukuti twalikatamika ishuko lya kusenda ishina lya kwa Lesa.
6. Lishuko nshi twingakwata ino nshita no muyayaya?
6 Ilelo, tulemona uko ukubilisha kwa kwa Yehova kulefishiwapo ukwa kuti: “Ukufuma ukutula akasuba no kufika uko kawa lyalikule shina lyandi mu nko.” (Mal. 1:11) Natutwalilile ukwishibisha icine pali Yehova no ‘kucindike shina lyakwe lya mushilo umuyayaya umuyayaya.’—Amalu. 145:21.