Amano Yafuma mu Kusambilila Pali Lesa Yalicilapo Ukucindama
1 Abantu bamo batontonkanya ukuti Inte sha kwa Yehova bafwile ukubomfya amaka yabo ku kwafwa ukupwisha amafya abantunse bakwete ilelo. Abantu ba musango yu bafilwa ukumona ukuti umulimo wesu uwa kusambilisha Baibolo walicilapo ukucindama. Caba nga fintu umutumwa Paulo alembele ati: “Icebo icilanda pa cimuti ca kucushiwilwapo buwelewele ku baleonaika, lelo maka ya kwa Lesa kuli ifwe fwe balepusushiwa.” (1 Kor. 1:18) Cine cine, twalishiba ukuti ubutumikishi bwa Bwina Kristu e mulimo wacindamisha uulecitwa pano isonde lelo.
2 Imikalile Ilawaminako Ino Ine Nshita: Abantunse tabatunguluka sana mu mulimo wa kwesha ukupwisha amafya. Amafunde tayalenga bumpulamafunde ukukanafulilako. Ifipangano fya mutende na bashilika basungilila mutende tafyapwisha inkondo. Imilimo ya kupakamisha imikalile tayapwisha ubupiina. (Amalu. 146:3, 4; Yer. 8:9) Ubukombe bwa Bufumu bwena bwalyalula iminshipendwa ya bantu pa kubafwa ukufwala ubuntu bupya ubutemuna Lesa. (Rom. 12:2; Kol. 3:9, 10) Mu kucite fyo, imikalile yabo ilawaminako na ino ine nshita.—1 Tim. 4:8.
3 Inshita ya ku Ntanshi Iisuma: Ukulunda pa kutwafwa ukucimfya amafya ya mikalile nomba, amano yafuma mu kusambilila pali Lesa yatwafwa ukupekanishisha bwino ifya ku ntanshi. (Amalu. 119:105) Yatulenga ukukanayobeka mu matukuto ya kwalula buno bwikashi. (Luk. Mil. 1:15; Rom. 8:20) Tulatasha nga nshi ukuti tatuleonaula ubumi bwesu ukusupila ubuyo bwa fye! Lelo, umulimo tubomba sana washimpwa pa bulayo bwacetekelwa ubwa kwa Yehova ubwa “myulu ipya ne sonde lipya” umukekala ubulungami. Ilyo ubushiku bwa bupingushi ubwa kwa Yehova bukesa, cikaba icayeba ukuti abatetekele amano yafuma mu kusambilila pali Lesa basalile icalungama.—2 Pet. 3:10-13; Amalu. 37:34.
4 Nangu ca kuti abayobeka mu “mano ya bwikashi buno” kuti bamona kwati amano yafuma mu kusambilila pali Lesa tayafwa kantu, ukukonka aya mano e cisuma ukucita. (1 Kor. 1:21; 2:6-8) E co, tutwalilila ukubila mwi sonde lyonse ubukombe bufuma kuli Lesa, “uwa mano eka.”—Rom. 16:27.