“Kusheni Imitima”
1. Bushe umo umo muli ifwe mulimo nshi akwata?
1 Fwe babwananyina ba Bwina Kristu bonse umo umo, twaba no mulimo wa kulenga icilonganino ukuba ne citemwiko. (1 Pet. 1:22; 2:17) Icitemwiko ca musango uyo cibako ilyo ‘tulekusha imitima’ no kubelana inkumbu. (2 Kor. 6:12, 13) Bucindami nshi bwaba mu kwishiba bwino bamunyinefwe na bankashi?
2. Bucindami nshi bwaba mu kulundulula bucibusa na basumina banesu?
2 Bucibusa Bulakosa Icine Cine: Nga twaishibana sana na basumina banesu, tulacindika nga nshi imisango yabo, e kutila icitetekelo cabo, ifyo bashipikisha, ne mibele yabo imbi iisuma. Tatukusha ifilubo fyabo, kabili bucibusa bukalakosa icine cine. Nga twaishibana bwino bwino, tukalakuulana no kusansamushanya. (1 Tes. 5:11) Kuti twaba ‘ica kukoselesha’ kuli bambi no kubafwa ukukaana ukusonga kwabipa ukwa kwa Satana. (Kol. 4:11) Ala mwandini tulatemwa icine cine ukuba na bacibusa basuma pa kati ka bantu ba kwa Yehova ilyo tuleshingwana ne shi nshiku sha kulekelesha ishaisulamo amafya!—Amapi. 18:24.
3. Bushe kuti twaba shani ica kukoselesha kuli bambi?
3 Bacibusa ba cine cine kuti batukosha nga nshi kabili kuti ba tusansamusha ilyo tuli na mesho ayabipisha. (Amapi. 17:17) Umwina Kristu umo uwalemona kwati tacindama ebukisha ati: “Bamunyinane bali fibusa, balenkoselesha no kunjafwa ukuleka ukutontonkanya filya naletontonkanya.” Bacibusa wa musango uyo lipaalo lyafuma kuli Yehova.—Amapi. 27:9.
4. Bushe kuti twaishibana shani bwino na bambi mu cilonganino?
4 Angweni Bambi: Bushe kuti twakusha shani imitima yesu no kwikatila abasumina banesu inkumbu? Ukulunda pa kuposha bambi pa kulongana kwa Bwina Kristu, muleipamfya ukulanda na bo ilyashi ilya kukoselesha. Ukwabulo kwipukisha sana amepusho mushilingile kwipusha, angweni kuli bena. (Fil. 2:4; 1 Pet. 4:15) Ukwita bambi ku kulya na imwe ica kulya ni inshila na imbi iya kwangilwamo bambi. (Luka 14:12-14) Nelyo kuti mwapangana na bo ukubomba mu mulimo wa kubila. (Luka 10:1) Nga tuleyambilako fye fwe bene ukwishibana na bamunyinefwe, tulalenga icilonganino ukwikatana nga nshi.—Kol. 3:14.
5. Bushe ni nshila nshi imo iyo twingapangilamo ifibusa ifingi?
5 Bushe twatemwa ukusala abanensu pa bo tulingene na bo umushinku nelyo abatemwa ifyo twatemwa? Tatufwile ukuleka ifi ukutucilikila ukupanga abanensu abengi mu cilonganino. Davidi na Yonatani na Ruti na Naomi bucibusa bwabo bwalikosele icine cine nelyo balipusene mu mishinku na mu fyo bakushiwe. (Ruti 4:15; 1 Sam. 18:1) Bushe na imwe teti mupange ifibusa ifingi? Ukucita ifyo kuti kwamuletela amapaalo ayo mushingelenganya.
6. Busuma nshi bwaba mu kukusha imitima no kubelana inkumbu bamunyinefwe?
6 Nga tulekusha imitima no kubelana inkumbu, tulakoseleshanya no kukusha umutende mu cilonganino. Na kabili, Yehova na o alatupaala pa kutemwa bamunyinefwe. (Amalu. 41:1, 2; Heb. 6:10) Mulandu nshi mushingabela no buyo bwa kwishibanina bwino na bamunyinenwe abengi nga nshi?