Yehova Alaafwa Abamutetekela
1 Abantu abengi bamona indalama, amaka, no kwishiba imilimo ukuti e filenga umuntu ukutunguluka. (Amalu. 12:4; 33:16, 17; 49:6) Lelo, abatiina Yehova no kutetekela wena balaiwa muli Baibolo ukuti “uwa kubaafwa kabili inkwela yabo ni Wene!” (Amalu. 115:11) Natulande pa mbali shibili umo tulingile ukulangila ukutetekela kwesu muli Yehova.
2 Mu Kupyunga Ukwa Bwina Kristu: Lyonse ilyo tulefunda mu cilonganino nelyo ilyo tulesambilisha mu mulimo wa kushimikila, tulingile ukutetekela Lesa wesu. Tontonkanyeni pa fyo Yesu alebomba. Nangula ali Mwana wa kwa Lesa, tatetekele mu mano yakwe umwine nelyo mu fyo aishibe lelo ashintilile pali Wishi wa ku muulu. (Yoh. 12:49; 14:10) Pali bufi ifwe, tufwile ukucilapo ukumutetekela! (Amapi. 3:5-7) Yehova nga atukosha, e lyo ukubombesha kwesu ukunono kukamucindika kabili kukanonsha bambi.—Amalu. 127:1, 2.
3 Tulanga ukuti twashintilila pali Yehova ilyo tupepa ukuti atutungulule no kutwafwa ukupitila mu mupashi wakwe uwa mushilo. (Amalu. 105:4; Luka 11:13) Na kabili, tulanga ukuti twalitetekela Lesa pa kubomfya Icebo cakwe, Baibolo ilyo tulesambilisha. Ubukombe bwabamo bwalikwata amaka ya kufika abantu pa mitima no kwalula ubumi bwabo. (Heb. 4:12) Ilyo ‘tulepyunga kwati ni ku bukose ubo Lesa apeela,’ Yehova alacindikwa.—1 Pet. 4:11.
4 Ilyo Tuli na Mafya: Tulekabila na kabili ukushintilila pali Yehova pa kuti atwafwe ilyo tuli na mafya. (Amalu. 46:1) Tutile, abakalamba ba ncito bakaana ukutupeela cuti wa kuti tukasangwe ku kulongana kukalamba, nelyo nalimo twakwata ubwafya bwabipisha mu lupwa lwesu. Tulanga ukuti twalitetekela Yehova pa kupepa kuli wene e lyo no kubomfya ubutungulushi atupeela ukupitila mu Cebo cakwe no kuteyanya kwakwe. (Amalu. 62:8; 119:143, 173) Ilyo balecita ifi, ababomfi ba kwa Yehova balaimwena ukwafwa kwakwe mu mikalile yabo.—Amalu. 37:5; 118:13, 16.
5 Yehova umwine atulaya ukutila: “Alipaalwo muntu uutetekela Yehova, uo Yehova abe ca kutetekelako cakwe.” (Yer. 17:7) Shi natulelanga ifyo twamutetekela muli fyonse ifyo tucita!—Amalu. 146:5