Isukulu lya Kukansha Ilya Butumikishi—Umwinshi Ukalamba Uutungulula ku Milimo Yalekanalekana
1 Yehova asobele muli kasesema Yeremia ati: “Nkemika pali shene [pa bantu bandi] abacemi abakashicema; tashakatiine kabili iyo, nangu kutentuka, kabili tashakabulilepo, cisemo ca kwa Yehova.” (Yer. 23:4) Uyu mulimo wa bucemi ulebombwa mu ba nko shonse. Ulebombwa na baeluda abengi sana mu filonganino. Na kabili, abalumendo abengi ngo mume na bo baliipeela ku kubombela Yehova. (Amalu. 110:3) Mwandini aba bamunyina baicefya baba lipaalo ku filonganino fya bantu ba kwa Lesa! Ilyo umulimo wa ku mupashi uwa kulonganya abantu ulebombwa, abaume bafikapo abaipeela ukubombela bamunyinabo bacili balekabilwa.
2 Icisuma icacitwa ku kukansha baeluda na babomfi batumikila abashimbe ku kubombe milimo yalundwapo, kuteyanya Isukulu lya Kukansha Ilya Butumikishi. Abasambi ukucila 22,000 abafuma mu fyalo 140 balikanshiwa mu makalasi 999 ayacitwa ukutula apo isukulu lyatendekele mu 1987. Kuli aba bamunyinefwe, Isukulu lyaba ‘mwinshi ukalamba uwaisuka uwa kubombeshamo.’—1 Kor. 16:9.
3 Ico Isukulu Lyabelako: Isukulu lya Kukansha Ilya Butumikishi lyabelako ukusambilisha abaume ukufikapo ukubomba imilimo konse ukwingaba ukukabila mu kuteyanya. Isukulu lilenga balamuke sana mu kutungulula umulimo wa kushimikila, mu kucema umukuni, no kusambilisha mu cilonganino. Nga bapwisha isukulu, abasambi bamo balasontwa ukuba bapainiya baibela nelyo bakangalila benda mu fyalo bekala nelyo mu fyalo fimbi. Bambi babeba ukuyabombela mu filonganino fya ku mwabo nelyo mu ncende shimbi umwaba sana ukukabila ishabela mu cifulo cangalilwa no yo musambo.
4 Mu masomo yabo ayasenda imilungu 8, abasambi balasambilila sana Baibolo. Balasoma bwino bwino amafundisho ya Baibolo pamo ne milimo ya bucemi e lyo ne fya kubomba pa milandu ima mu mikalile ya Bena Kristu. Balasambilila na pa fyo Amalembo yalanda pa fya kutungulula, ukupingule milandu, na pa kuteyanya. Balakanshiwa bwino ne fya kulanda ku cintubwingi, kabili balafwiwa umo umo lwa ku mupashi pa kuti balunduluke sana.
5 Ififwaikwa: Ca cine ukuti ififwaikwa pa kukanshiwa muli ili sukulu fikalamba. Abalefwaya ukukanshiwa bafwile ukuba baeluda nelyo ababomfi batumikila ababomba pa myaka ibili ukwabula ukuputaukisha. Bonse bafwile ukuba abashimbe aba myaka ukutampila pa 23 ukufika ku 50. Abalefwaya isukulu bafwile ukwishiba ukubelenga, ukulemba, no kulanda bwino ululimi isukulu litungulwilwamo, kabili bafwile ukuba abatuntulu, abashikabila ukusakamana kwaibela nelyo imiliile yaibela. Bapainiya e bafwaikwa na sana.
6 Abaipeelesha bafwile ukuitemenwa e lyo no kukumanisha ukubomba konse uko babafwaya. Pa kucite ici, umo afwile ukuba ifyali kasesema Esaya, uwaipeeleshe ukubomba umulimo waibela, ilyo atile “Moneni, ine; ntumeni.” (Esa. 6:8) Kabili aliicefeshe ubumi bwakwe bonse. Ukutemwa bamunyinabo no kufwaisha ukubabombela, e cifwile ukulenga umo ukufwaya ukuya kwi Sukulu lya Kukansha Ilya Butumikishi, te kufwaya ukulumbuka nelyo icifulo caibela. Ilyo bakanshiwa bwino, abapwisha isukulu bafwile ukukonka ifyo basambilila pa kuti banonshe bambi.—Luka 12:48.
7 Ubusuma Bwabamo: Mu milungu 8 iyo bakanshiwa ifintu ifingi, abapwisha isukulu ‘balaliishiwa ku fyebo fya citetekelo ne fye sambilisho lisuma.’ (1 Tim. 4:6) Uku kukansha kulabafishapo ukwafwa no kukoselesha bambi mu filonganino batumwa na mu miputule. Mu fifulo ifingi umo abapita mwi Sukulu lya Kukansha Ilya Butumikishi batumwa, umulimo wa mwi bala walilundulukilako; abengi balikoseleshiwa ukuba bapainiya, sana sana abacaice; kabili abapya abengi abalongana pamo na bantu ba kwa Lesa balyafwiwa.
8 Bushe ni mwe baeluda nelyo ababomfi batumikila abashimbe, abali ne myaka ukutampila pa 23 ukufika ku 50? Kuti mwatontonkanya ukuya kwi Sukulu lya Kukansha Ilya Butumikishi. Bushe uli munyinefwe wacaice uulepanga ukubombela Yehova ku ntanshi? Yangusha imikalile yobe pa kuti taupumbwilwe ukwingila pa “mwinshi uukalamba uwa kubombeshamo.” Ukakwata insansa ishingi kabili ukamwenamo. Cine cine Isukulu lya Kukansha Ilya Butumikishi lyaba lipaalo ku bakanshiwako na ku filonganino fya bantu ba kwa Lesa mwi sonde lyonse.
[Akabokoshi pe bula 3]
Ifyo Bamwenenemo mu Kukanshiwa
“Ukukanshiwa kwanenga ukubomba bwino ubutumikishi no kucema umukuni na mano, ukubomfya Amalembo.”
“Isukulu lyanenga ukuleka ukuitwishika pa kubomba imilimo yalekanalekana mu cilonganino.”
“Isukulu lyalyalula ifintu ifingi mu bumi bwandi, pamo fye ne fyo nalemona imitekele ya kwa Lesa no kuteyanya kwakwe.”
“Ifyo nakanshiwa fyangafwile ukwishiba ukuti calicindama ukuitemenwa ukubombela ukuli ukukabila.”