Kuti Twashimikila Shani Kuli Balupwa?
1. Mulandu nshi ukushilimuka kufwaikilwa pa kushimikila balupwa?
1 Ifyo twingatemwa ukwingila mu calo cipya pamo na balupwa wesu, no kwikatana pamo na bo mu kupepa Yehova! Ici kuti cacitika fye nga tuleshimikila kuli balupwa wesu. Lelo pa kushimikila mu nshila isuma, ukushilimuka kulafwaikwa. Kangalila wa muputule umo atile: “Ababimbula ukufwaisha kwa kusambilila icine muli balupwa wabo no kulashimikila kuli bene panono panono balatunguluka.” Kuti twacita shani ci?
2. Ukusakamana sana balupwa lwesu kuti kwabalenga shani ukufwaisha ukusambilila?
2 Balengeni Ukufwaisha: Tontonkanyeni sana pa fyo mwingalenga balupwa wenu ukutampa ukusambilila. (Amapi. 15:28) Finshi fibasakamika? Bwafya nshi bakwata? Nalimo kuti mwaesha ukubalanga ilembo nangu umutwe we lyashi uusuma uulebakuma nga nshi. Nga ca kuti balupwa wenu bekala ukutali, nalimo kuti mwabalembela fye kalata nangu ukubatumina lamya. Ukwabula ukufusha sana ifyebo, byaleni imbuto sha cine muli bena, kabili shintilileni pali Yehova ukuti akamesha isho mbuto.—1 Kor. 3:6.
3. Ukutemwa uko balupwa batemwa ifyo tucita kuti kwatungulula shani ku kushimikila?
3 Yesu aebele umwaume uo atamfishemo ifibanda ati: “Kabiye ku ng’anda kuli balupwa bobe, no kubashimikila fyonse ifyo Yehova akucitila ne fyo akubelelo luse.” (Marko 5:19) Tontonkanyeni ifyo ici cifwile cafikile sana pa mitima ya lupwa lwa ulya muntu! Nangu cingatila icintu cakula nge fi te kuti cimucitikile, nangu cibe shani balupwa wenu balitemwa ifyo mucita nangu ificita abana benu. Ukulanda pa lyashi mwalandile mwi Sukulu lya Butumikishi, ifyali ukulongana kwa citungu mwasangilweko, ifyo mwamwene ku Bethel ilyo mwatandele, nangu cimo icacindama icamucitikile kuti limbi fyalenga mwalanshanya nabo ifingi pali Yehova na pa kuteyanya kwakwe.
4. Finshi tushilingile ukucita ilyo tuleshimikila balupwa?
4 Muleiluka: Ilyo muleshimikila kuli balupwa, sengaukeni ukubeba ifingi pa muku umo. Lintu munyinefwe umo aibukishe ifyo cali ilyo atendeke fye ukusambilila Baibolo, asumine ukuti: “Nafumfumwinine bamayo ifyebo fyonse pa nshita iitali ukufwaya ukubalondolwela fyonse fye ifyo nasambilile muli Baibolo, kabili ilingi line ici calelenga kwaba ukukansana, ukucilisha na batata.” Nangu fye lintu lupwa amoneka ukufwaisha ukwishiba ubukombe bwa Baibolo, mwasukeni mu musango wa kuti ashala ne cilaka ca kufwaya ukwishibilapo na fimbi. (Amapi. 25:7) Lyonse beni no mucinshi, icikuuku, no kutekanya, kwati ni filya mwingacita nga mulelanda na bambi bambi fye mu mulimo.—Kol. 4:6.
5. Kuti twacita shani nga ca kuti balupwa tabaleankula bwino ilyo tuleshimikila kuli bena?
5 Pa nshita imo, balupwa lwa kwa Yesu batontonkenye ukuti nafulungana. (Marko 3:21) Lelo, bamo pa numa balisumine. (Imil. 1:14) E ico nga mwaesha umuku wa kubalilapo ukulanda na balupwa wenu pa cine lelo tabankwile bwino tamulingile ukunenuka. Imibele na matontonkanyo ya bantu kuti fyaaluka. Twalilileni ukulolela inshita imbi ilyo mwingabebako icishinka icingalenga bafwaisha ukusambilila. Kuti mwaba ne nsansa sha kubafwa ukutendeka ukwenda pa nshila ya ku mweo wa muyayaya.—Mat. 7:13, 14.