Ukutantika kwa Lupwa—Ukulongana kwa Cilonganino
1 Nga muli bafyashi Abena Kristu, mufwaya ilyo abana benu balekula baletemwa Yehova no kumubombela, pa kuti bakanonke umweo wa muyayaya mu calo cipya icalaiwa ica kwa Lesa. Kuti mwabafwa shani ukubika ukupepa Yehova pa ntanshi mu bumi bwabo? Inshila ibomba bwino sana ca kumwenako cenu. (Amapi. 20:7) Lintu aibukishe ica kumwenako ca banyina Abena Kristu, nkashi umo atile: “Takwali no kutwishika nampo nga twali no kuya mu kulongana. Lyonse fye twaleya.” Ici camulengele ukucindamika ukulongana ilyo akulile.
2 Bushe ulupwa lwenu lwalishiba umulandu ukulongana kwacindamina? Ifyo tusambilishiwa pali uku kulongana filatwafwa ukutwalilila ukucita ukufwaya kwa kwa Lesa, kabili bucibusa tuipakisha na bamunyinefwe bulatukoselesha sana. (Esa. 54:13; Rom. 1:11, 12) Lelo, ubufwayo bwine bwine ubwa uku kulongana kulumbanya Yehova “mu nkuta.” (Amalu. 26:12) Ukulongana kwa Bwina Kristu kulatwafwa ukulangisha ukutemwa kwesu ukwa kuli Yehova no kumupepa.
3 “Cenjeleni pa Kwenda Kwenu”: Ukucindamika ubufwayo bwashila ubwa kulongana bukatulenga ukuba ‘abacenjela’ pa kuti tatupangile icibelesho ukushala mu kulongana pa milandu ishacindama. (Efes. 5:15, 16; Heb. 10:24, 25) Lintu muletantikila ulupwa ifya kucita, mubalilepo ukulemba inshita sha kulongana. Mumone ukuti takuli imilimo imbi iikalapumfyanya inshita ya kulongana. Shininkisheni ukuti ukusangwa mu kulongana kube ica ntanshi ku lupwa lwenu.
4 Bushe tumfwa shani lintu tubelenga pa fyo bamunyinefwe bacimfya amafya pa kuti fye basangwe ku kulongana kwa cilonganino, ukwa muputule, no kwa citungu? Limbi imibele yenu yalibako bwino, lelo na imwe bene, mulakumanya amafya. Satana alekoseshako imibele pa kuti abantu ba kwa Lesa bafilwe ukupepa Yehova. Na lyo line, cetekeleni ukuti abana benu cine cine bakamona umupampamina wa lupwa lwenu uwa kusangwa mu kulongana. Ca cine, ukucita ifyo, mukasambilisha abana ica bupe ca ku mupashi ico bashakalabe.