Ukushimikila Kulatwafwa Ukushipikisha
1 Icebo ca kwa Lesa citweba ukuti “tubutuke no kushipikisha ulubilo ulwabikwa pa ntanshi yesu.” (Heb. 12:1) Nga filya fine uubutuka ulubilo alingile ukushipikisha pa kuti acimfye, na ifwe tufwile ukushipikisha pa kuti tukapoke icilambu ca mweo wa muyayaya. (Heb. 10:36) Bushe umulimo twapeelwa fwe Bena Kristu utwafwa shani ukushipikisha ukufika ku mpela?—Mat. 24:13.
2 Tulaba Abakosa ku Mupashi: Ukweba abantu ukuti Baibolo yalilaya ukutila kukaba icalo icalungama kulenga icitetekelo cesu ukukosa. (1 Tes. 5:8) Nga ca kutila lyonse tulebomba umulimo wa kushimikila, tulakwata ishuko lya kwafwa abantu ukwishiba icine ico twasambilila mu Baibolo. Iba ni nshita ya kulondolola ifyo twasumina, ne ci cilenga twaba bakapepa bakosa.
3 Pa kuti tusambilishe bambi bwino, tufwile intanshi twaishiba icine ca mu Baibolo. Tufwile ukusokota no kutontonkanya pa fyebo twasanga. Nga tulesokota tuleshiba ifintu ifingi, tulakosha icitetekelo cesu, no kukosa mu kupepa. (Amapi. 2:3-5) E ico, ilyo tuleafwilisha bambi, ninshi na fwe bene tuleikosha.—1 Tim. 4:15, 16.
4 Ukucincila mu mulimo cikankaala cimo icaba pa fya kufwala “fya bulwi fyakumanina ifya kwa Lesa,” ifyo tufwile ukufwala pa kuti tukose ukulwisha Kaseebanya ne fibanda. (Efes. 6:10-13, 15) Ukubomba imilimo Lesa atupeela kulatwafwa ukubika amano pa fikuulilila e lyo no kukanasendwa ku calo ca kwa Satana. (Kol. 3:2) Ilyo tulesambilisha abantu ifyo Yehova afwaya bena ukuba, tulaicinkulako na fwe bene ukuti tufwile ukuba ne myendele isuma.—1 Pet. 2:12.
5 Lesa Alatukosha: Ica kulekelesha, umulimo wa kubila imbila nsuma ulatusambilisha ukucetekela Yehova. (2 Kor. 4:1, 7) Ili lipaalo icine cine! Ukucetekela Yehova kulatwafwa ukubomba umulimo twapeelwa e lyo no kushipikisha te mulandu ne catucitikila. (Fil. 4:11-13) Ca cine, ukusambilila ukucetekela Yehova e cikatwafwa ukushipikisha. (Amalu. 55:22) Ukushimikila kulatwafwa ukushipikisha mu fingi fye.