Beni Abacenjela mu Kulondolwela Abantu Icine
1. Lyashi nshi ilya mu Baibolo ilyo twalalandapo, kabili mulandu nshi?
1 Ilyashi umutumwa Paulo alandile mwi sunagoge lya mu Antioke wa ku Pisidia, ilyalembwa pa Imilimo 13:16-41, lilanga bwino bwino ifyo tufwile ukupelulula bwino ilyo tulelanda na bantu. Ilyo Paulo alebila imbila nsuma, alemona ifyo abo alelanshanya na bo basumina ne mitontonkanishishe yabo. Ilyo tulelanda pali ili lyashi, natumone ifyo twingapashanya ifyo acitile ilyo tuleshimikila.
2. Cinshi tulesambililako ku fyo Paulo atendeke ilyashi lyakwe?
2 Fwayeni Ico Mwingasuminishanya: Nangu ca kutila Paulo alelanda pa kutila Yesu alikwata umulimo ukalamba mu kufikilishiwa kwa kufwaya kwa kwa Lesa, talandile ico cishinka pa ntendekelo ya lyashi lyakwe. Lelo, alandile pa cintu ico ena na baYuda abengi abo alelanda na bo basumine. Ne ci, ni ntuntuko ya luko lwa baYuda. (Imil. 13:16-22) Na ifwe bene tukashimikila abengi nga ca kutila tulefwaya ukulanda pa co twingasuminishanya. Lelo pa kucite ci napamo tukakabila ukubepusha amepusho ayasuma pa kuti balande ifyo basumina e lyo no kukutikisha pa kuti twishibe icacindama sana kuli bena.
3. Cinshi calengele ukuti cikose ku balekutika kuli Paulo ukusumina ukuti Yesu ali ni Mesia wasobeelwe ukuti akesa?
3 Ilyo Paulo alandile pa ntuntuko ya baYuda, alecinkulako abaYuda ukuti Lesa alilaile ukuleta Umulubushi ukufuma mu bufyashi bwa kwa Davidi. Lelo, abaYuda abengi balelolela umushilika kabili impalume uwali no kubalubula ku mutitikisha wa buteko bwa bena Roma no kusumbula uluko lwa baYuda ukucile nko shimbi. Balishibe bwino bwino ukuti Yesu balimukeene ku ntungulushi sha baYuda mu Yerusalemu, bamutwele ku balashi ba Roma, kabili alipaiwe. Bushe Paulo ali no kubalanga shani ukuti uyu wine E Mesia wasobelwe ukuti akesa?
4. Bushe Paulo acitile shani pa kulondolwela bwino abaYuda aleshimikila?
4 Landeni Ifyo Batontonkanyapo: Apo Paulo alishibe ifyo abo alelandako baletontonkanya, abomfeshe Amalembo pa kubalondolwela fimo ifyo basumine na bo bene. Ku ca kumwenako, alandile pali Yesu ukuti ni mwana Davidi no kuti e o Yohane Kabatisha uwaishibikwe ku bengi ukuti ni kasesema wa kwa Lesa alebila. (Imil. 13:23-25) Paulo atile ilyo intungulushi sha mapepo shakeene Yesu no kumwipaya, “bafishishepo ifintu fyalandile Bakasesema.” (Imil. 13:26-28) E lyo atile kwali abamweneko ilyo Yesu abuushiwe ku bafwa, kabili alandile pa Malembo baishibe ayafikilishiwe mu kubuuka kwa kwa Yesu.—Imil. 13:29-37.
5. (a) Bushe Paulo alandile mu nshila nshi ilyo alelanda ku baGriki? (b) Kuti twapashanya shani Paulo ilyo tuleshimikila mu cifulo cesu?
5 Lelo, ilyo aleshimikila abaGriki pa Areopagi mu Atena, Paulo alandile mu nshila imbi. (Imil. 17:22-31) Nomba kwena icishinka alelandapo cali cimo cine, kabili mu kushimikila abaYuda na baGriki monse mwalifumine ifisuma. (Imil. 13:42, 43; 17:34) Na ifwe pali lelo tukabomba bwino sana ubutumikishi nga twalanda pali fimo ifyo ifwe na bo tulelanda na bo twingasuminishanya na lintu tuletontonkanya pa fyo baishiba na pa fyo batontonkanya.