Langeni Ukuti Mulasakamana Abantu—Pa Kubebeta Ifilecitika
1 Yehova Lesa na Kristu Yesu e beshiba sana ifyo abantu bakabila kabili e babafwa sana. (2 Imila. 16:9; Marko 6:34) Nga twaishiba ifyo abo tusanga mu butumikishi batemwa ne fibasakamika, kuti twabila imbila nsuma ukulingana ne fyo twamona.
2 Bikeni Amano Kuli Fyonse Ifyo Mulemona: Yesu alelolekesha ifyalecitika. (Marko 12:41-43; Luka 19:1-6) Na ifwe nga twafika pa ng’anda ya muntu no kumona ifya mapepo ifyo abika mu ng’anda, ifyalembwa pa motoka, no twa kwangasha abaice utuli mu lubansa, kuti twaishiba ifya kulandapo pa kuti tubile bwino imbila nsuma.
3 Ifyo icinso ca muntu cilemoneka ne fyo alecita kuti fyatweba ifyo ali. (Amapi. 15:13) Napamo ukufwilwa nelyo ubwafya bumbi e filengele akabile icisansamushi. Kuti aumfwa bwino nga twamubelengela amalembo ayalelanda pa bwafya bwakwe. (Amapi. 16:24) Bushe umwine wa ng’anda alekumpauka ukufuma mu ng’anda nelyo bushe ekete umwana uulelila? Nga ni fyo kuti cawama ukumfwana nankwe ukuti mukamutandalile inshita imbi. Nga natwangwa umuntu kabili ‘twamulangulukilako,’ kuti akutika nga twabwelelako.—1 Pet. 3:8.
4 Landeni Ifyebo Ifikumine Ifilecitika: Umutumwa Paulo amwene ukuti mu musumba wa Atena mwali iciipailo icakuulilwe “Lesa Uushaishibikwa.” E ico abilile imbila nsuma ukulingana ne fyo amwene pantu atile: “Ico uo mupepa untu mushaishiba e o ndesabankanya kuli imwe.” Inshila isuma iyo Paulo alandilemo yalengele abalipo ukukutika ku bukombe bwa Bufumu no kutetekela.—Imil. 17:23, 34.
5 Na ifwe nga tulelolekesha ifilecitika, kuti twaishiba ifyo umuntu atemwa, ne co kuti catwafwa ukulanda pa fyo engatemwa ukumfwa. Ipusheni ifipusho ifingalenga umwine wa ng’anda ukulanda ifyo atontonkanya. Tontonkanyeni pa malembo ayo mwingabomfya pa kuti afwaishe ukukutika. (Amapi. 20:5) Ukubebeta ifilecitika no kusakamana sana abantu kuti kwatwafwa ukuba bakabila ba mbila nsuma abacenjela.