Amasambililo Ayatwala ku Bumi
1 Tulomfwa bwino sana ukumona abantu basekelela ilyo baumfwa icine icaba mu Cebo ca kwa Lesa! Ukwafwa bambi ukwishiba Lesa no bufwayo bwakwe kulaleta insansa sana. Ayo masambililo kuti yatungulula umuntu ku mweo wa muyayaya.—Yoh. 17:3.
2 Ico Ayo Masambililo Yawamina Ukucila Yonse: Muno nshiku kwaba ukusambilila pa fintu ifingi sana mu nshila shalekanalekana. (Luk. Mil. 12:12) Lelo ayo masambililo te kuti yalingane no kusambilila “ifyapuulama fya kwa Lesa.” (Imil. 2:11) Bushe amasambililo yaba muno calo yalilenga abantu ukupalama kuli Kabumba no kwishiba ukufwaya kwakwe? Bushe yalyafwa abantu ukwishiba icicitika umuntu nga afwa nelyo ukwishiba ico ukucula kwafulile fi? Bushe yalipeela abantu isubilo? Bushe yalyafwa indupwa ukwikala bwino? Iyo. Amasambililo yafuma kuli Lesa, e yengatwafwa fye ukusanga ifyasuko fya cine ku fipusho fyacindama ifyo twipusha mu bumi.
3 Amasambililo yafuma kuli Lesa yalatupeela icintu cimo icifwaikwa sana pano calo muli shino nshiku, ne ci, mibele isuma. Icebo ca kwa Lesa cilafumya ulupato mu mitima ya bantu abasumina ifyo cisambilisha e lyo no kufikonka. (Heb. 4:12) Calilenga abantu ukuleka ulukaakala lonse apo lwapela no ‘kufwala ubuntu bupya.’ (Kol. 3:9-11; Mika 4:1-3) Na kabili ifyo Lesa asambilisha fyalenga abantu abengi ukuba na maka ya kuleka ukucita ifyabipa ifyo balecita kale, ifilenga Lesa ukufulwa.—1 Kor. 6:9-11.
4 Ico Tufwile Ukubikilako Sana Amano: Kasambilisha wesu Uwakulisha alatweba ifyo inshiku tuleikalamo shili. Mu fya bupingushi bwakwe ifyo asobela mwaba ubukombe bwacindama ubufwile ukubilwa pano isonde ponse. (Ukus. 14:6, 7) Kristu aleteka mu muulu, ukupepa konse ukwa bufi kwalaonaulwa nomba line, kabili Ubufumu bwa kwa Lesa buli no konaula amabufumu yonse aya pano isonde. (Dan. 2:44; Ukus. 11:15; 17:16) Kanshi abantu bafwile ukwishiba bwangu Imfumu ileteka iyo Lesa asala, bafwile ukufuma muli Babiloni Mukalamba, no kulilila kwi shina lya kwa Yehova mu citetekelo. (Amalu. 2:11, 12; Rom. 10:13; Ukus. 18:4) Kanshi natulebombesha uyu mulimo wa kusambilisha bambi ifintu ifingabatwala ku mweo.