Afweni Abantu Ukumwenamo mu Cilubula
Icibukisho ca Mfwa ya kwa Kristu Cikabako pa April 12
1. Ni nshila nshi iyo abantu ba kwa Lesa balangilamo ukuti balatasha pa cilubula?
1 “Kube ukutootela kuli Lesa pa ca bupe cakwe icishingalondololwa.” (2 Kor. 9:15) Ayo mashiwi yalalondolola bwino ifyo tuyumfwa pa busuma ne cikuuku ifyo Lesa alanga ukupitila mu Mwana wakwe, Yesu Kristu. Tukalanga ukuti tulatasha, sana sana nga twalongana pa April 12 ku kusefya Icibukisho ca mfwa ya kwa Kristu.
2. Ni bani basangwa ku kusefya Icibukisho pamo ne Nte sha kwa Yehova, kabili cinshi bakabila ukucita pa kuti bamwenemo mu cilubula?
2 Cila mwaka abantu napamo amamilioni 10 balasefyako Icibukisho pamo na babomfi ba kwa Yehova. Ici cilanga ukutila aba bantu na bo baletasha pa cilubula ca kwa Kristu. Lelo pa kutila bamwenemo mu cilubula, bafwile ukukwata icitetekelo. (Yoh. 3:16, 36) Kuti twabafwa shani ukuba ne citetekelo? Muli iyi nshita ya Cibukisho, kuti twabakoselesha ukutendeka ukusambilila Baibolo no kusangwa ku kulongana pa cilonganino. Ifyo mwingacita ni fi.
3. Kuti twatendeka shani ukusambilila Baibolo na bo tuleita ukutila bakasangweko ku Cibukisho?
3 Amasambililo ya Baibolo: Nga mwaita abalesekelela ku Cibukisho, esheni ukutendeka isambililo lya Baibolo nabo mu citabo ca Baibolo Isambilisha. Bebeni ukuti mulefwaya ukubalondolwela ifyo tusefya Icibukisho. Kupukuleni pa mabula 206-8 no kulanda pa mutwe uleti: “Umulalilo wa kwa Shikulu Ulenga Lesa Ukucindikwa.” Kuti mwalanda pa fyebo fyonse pa muku umo fye nelyo kuti mwafyakanya pabili. Napamo kuti mwalanshanya ilyo muletungulula isambililo pa mwinshi wa ng’anda. Nga mwapwa ukulanda pali ifyo fyebo, napamo umuntu kuti afwaya mwalanshanya, icipandwa 5, icakwata umutwe utila: “Icilubula, E Bupe Bwakulisha Ubwafuma Kuli Lesa.” Ilyo isambilililo lyakosa, bweleleni ku numa no kutendeka ukulanshanya ifipande fine ifya kubalilapo.
4. Ni bani twingatendeka ukusambilisha Baibolo muli iyi nshita ya Cibukisho?
4 Ni bani twingatendeka ukusambilisha Baibolo ukubomfya iyi nshila? Napamo abo mubomba na bo, abana be sukulu banenu, nelyo abena mupalamano kuti basumina ukusambilila. Bamunyina kuti balungama abaume abashasumina abaupa bankashi tulongana na bo. Kabili te kwesha ukulaba kuli balupwa lwenu abashili baNte. Na kabili tulefwaya ukubombesha sana ukwita abaleka ukulongana ukuti bakese ku Cibukisho. (Luka 15:3-7) Shi natweshe ukwafwa bonse abaleka ukulongana ukuti bamwenemo mu cilubula.
5. Kuti twakoselesha shani abasambi ba Baibolo na bantu bambi abalesekelela pa kuti balelongana?
5 Ukulongana kwa Cilonganino: Ukulongana kwa Cibukisho e kulongana uko abasambi ba Baibolo abengi na balesekelela basangwako. Nomba kuti twabakoselesha shani ukumwenamo na mu kulongana kwa cilonganino? Mu Ubutumikishi Bwesu Ubwa Bufumu ubwa April 2005, pe bula 8 batwebele ukutila: “Bebeni umutwe we lyashi lya ku cintubwingi ilikakonkapo. Balangisheni ifyebo mukasambilila pe Sambililo lya Ulupungu lwa kwa Kalinda ne Sambililo lya Citabo. Londololeni ukulongana kwe Sukulu lya Butumikishi Ilya Bulesa no Kulongana kwa Mulimo. Nga mwapeelwa ilyashi mwi sukulu, nalimo kuti mwapitulukamo pamo na bo. Bebeniko ifishinka fyacipulamo pa kulongana. Bomfyeni ifikope fyaba mu mpapulo shesu ukubafwa ukwelenganya ificitika ku kulongana. Balaalikeni ukusangwa ku kulongana umuku uwa kubalilapo fye mwasambilila na bo.”
6. Bushe abalefwaya icine kuti twabakoselesha ukucita finshi fibili pa kuti banonkelamo mu cilubula?
6 Nga ca kutila abalefwaya icine balesambilila Baibolo no kusangwa ku kulongana, balalunduluka bwangu. Kanshi natulekoselesha abantu ukulalya ifya ku mupashi ifyo tupokelela no kumwenamo mu Cilubula, ica bupe cakulisha icafuma kuli Lesa.