Sambilisheni Abafuuka Ukwenda mu Nshila sha kwa Lesa

1. Cinshi cikabilwa pa kuti tupange abasambi?

¹ Abasambi ba kwa Kristu aba kubalilapo balebeta ati “aba Nshila.” (Imil. 9:2) Abena Kristu ba cine bafwile ukumoneka muli fyonse ifyo bacita. (Amapi. 3:5, 6) Kanshi icikabilwa pa kutungulula amasambililo ya Baibolo, te kusambilisha fye ifyo Baibolo ilanda. Tufwile no kwafwa abasambi ba Baibolo ukwenda mu nshila sha kwa Yehova.—Amalu. 25:8, 9.

2. Cinshi cingalenga umusambi wa Baibolo ukukonka amafunde ya kwa Lesa?

² Ukutemwa Yehova na Yesu: Imitontonkanishishe yesu, imibele yesu, imyendele ne milandile yesu fifwile ukulingana no kufwaya kwa kwa Lesa, nomba ici tacayanguka ku bantu abashapwililika! (Rom. 7:21-23; Efes. 4:22-24) Lelo, ukutemwa Lesa no Mwana wakwe kulalenga abafuuka ukulacita fyonse ifi ukulingana no kufwaya kwa kwa Lesa. (Yoh. 14:15; 1 Yoh. 5:⁠3) Kuti twayafwa shani abo tusambilisha Baibolo ukuba no kutemwa kwa musango yu?

3. Kuti twayafwa shani umusambi ukutemwa Yehova na Yesu?

³ Afweni umusambi ukwishiba ifyo Yehova aba. Munyina umo alondolwele ati, “Abantu te kuti batemwe umuntu uo bashaishiba, kanshi ine ilyo natendeka fye isambililo, ndasambilisha umusambi ishina lya kwa Lesa ilyaba mu Baibolo, kabili lyonse ishuko nga lyamoneka ndalanda sana pa mibele ya kwa Yehova.” Ukulanda sana pa fyo Yesu alecita e cingalenga umusambi aishiba Yehova. (Yoh. 1:14; 14:9) E lyo cimbi, mulepituluka mu mukululo pa mpela ya cila cipandwa mu citabo ca Baibolo Isambilisha pa kuti mwafwe umusambi ukutontonkanya pa mibele ishaiwamina iya kwa Lesa no Mwana wakwe.

4. (a) Cinshi ukushimikila kukosela ku basambi abengi? (b) Kuti twayafwa shani abo tusambilisha ukutendeka ukushimikila?

⁴ Sambilisheni ku fyo Mucita: Fwe basambilisha no kutungulula abantu ku cine, tufwile ukulanga abantu umo ukwenda mu nshila sha kwa Lesa kwalola ukupitila mu fyo tucita. (1 Kor. 11:1) Ku ca kumwenako, abasambi ba Baibolo abengi tababelesha ukulanda na bo bashaishiba pa kuti babebeko ifyo basumina. Kanshi tukabila ukutekanya no kucenjela pa kubafwa ukuba no kutemwa, icitetekelo no kushipa, ifikabilwa pa kubombako umulimo wa kushimikila no kupanga abasambi. (2 Kor. 4:13; 1 Tes. 2:2) Ukufwaisha ukulanga abasambi ifya kushimikila e kukalenga twabomba na bo ilyo batendeka fye ukubomba umulimo wa Bena Kristu uwa kushimikila.

5. Bushe ukucita ifisuma kwafwa shani abasambi ukwishiba ifya kukonka amafunde ya kwa Lesa?

⁵ Ifyo mucita kuti fyasambilisha abasambi benu ukucita ifintu na fimbi ifyacindama mu mikalile ya Bena Kristu. Ilyo mwaya mu kupempula abalwele nelyo ilyo mwaposha bambi ne nsansa ku kulongana, balamona ukuti mwalikwata ukutemwa. (Yoh. 15:12) Nga mwawamyako Ing’anda ya Bufumu nelyo mwacitilako bambi fimo, ninshi mulebasambilisha ifya kubomba. (Yoh. 13:12-15) Nga bamona ukutila mwalyangusha imikalile, baleshiba ifya ‘kufwaya intanshi ubufumu.’—Mat. 6:33.

6. Finshi fifumamo ilyo tuleafwa abafuuka ukubombela Yehova?

⁶ Tukabila ukubombesha pa kusambilisha bambi Icebo ca kwa Lesa no kupanga abasambi. Lelo tulasekelela ukumona abafuuka ‘baleenda mu cine’!—3 Yoh. 4.