Bafweni Ukwishiba Imibele ya kwa Yehova Iishaiwamina no Kutasha Pali Yene
1 Ilyo tuleshimikila, tatusambilisha fye abasambi icine ca mu Baibolo ico bafwile ukwishiba pa kubala. Tulafwa abantu no kwishiba imibele ya kwa Yehova iishaiwamina e lyo no kutemwa yene. Ilyo abafwaya ukwishiba icine baishiba Lesa, balacitapo fimo, balalula imikalile yabo, ‘pa kuti bende umwawamina Yehova ku kuleka ateemunwe ukufikapo.’—Kol. 1:9, 10; 3:9, 10.
2 Icitabo Icipya Ica Kutungulwilamo Amasambililo: Ukutula fye pa ntendekelo, icitabo ca Baibolo Isambilisha cilalanda pa mibele ya kwa Yehova. Icipande ca kubalilapo fye, cilaasuka amepusho aya: Bushe cine cine Lesa alamusakamana?, Bushe Lesa aba shani?, na Bushe kuti twapalama kuli Lesa? Ici cipandwa citweba no kuti Yehova wa mushilo (para. 10), wa mulinganya no luse (para. 11), alikwata ukutemwa (para. 13), wa maka (para. 16), kabili wa nkumbu, alasenamina, alabelela uluse, alitekanya, e lyo wa cishinka (para. 19). Paragrafu 20 isondwelela na mashiwi ya kutila: “Nga mwasambilila sana pali Yehova, e lyo akaba uwa cine cine kuli imwe kabili mukamutemwa no kupalama kuli wene.”
3 Kuti twabomfya shani icitabo ca Baibolo Isambilisha ku kwafwa abasambi ba Baibolo ukupalama kuli Yehova? Nga twalanda pali paragrafu iilelanda pa mibele ya kwa Lesa, kuti twaipusha umusambi ati, “Finshi ici camusambilisha pa fyo Yehova aba?” nelyo “Bushe ici calanga shani ukutila Lesa alamusakamana pa lwenu?” Nga tuleipusha abasambi ifipusho fya musango yu pa kusambilila, ninshi tulebasambilisha ukutontonkanya pa fyo balesambilila no kubafwa ukwishiba Yehova no kutasha pa mibele yakwe iisuma sana.
4 Mulebomfya Umukululo wa Kupitulukamo: Pa mpela ya cipandwa conse, ebeni umusambi ukulandapo mu mashiwi yakwe pa cishinka cimo na cimo icili mu mukululo utila, “Ifyo Baibolo Isambilisha.” Landeni pa malembo yali mu mukululo. Pa kuti umusambi alande ifyo aletontonkanya, napamo kuti muleipusha ati: “Bushe ifyo Baibolo isambilisha pali ici cishinka fyaumfwika shani?” Nga mulecite fyo, kuti mulekomaila pa fishinka fikalamba ifili mu cipandwa kabili kuti mwaishiba ne fyo umusambi asumine ukufuma pa nshi ya mutima. Ici kuti calenga umusambi ukutendeka ukupalama kuli Yehova.