Twalipeelwa Icuma
1 Umutumwa Paulo alibikileko sana mano ku mulimo Lesa amupeele uwa kushimikila kabili awitile ukutila “cuma.” (2 Kor. 4:7) Ilyo alebomba uyu mulimo, ashipikishe amafya ayengi no kucula. Aali uwacincila ukubila imbila nsuma ku muntu fye onse uo alesanga. Ale-enda imilundu iingi ne nkasa e lyo na pali bemba. Ishi nyendo shali ishayafya kabili isha busanso. Bushe kuti twapashanya shani Paulo no kulanga ukuti twalicindika umulimo wesu? (Rom. 11:13) Cinshi cilenga umulimo wesu ukuba icuma icisuma nga nshi?
2 Icuma Icikalamba: Abantu pa kuti banonke ifyuma fya pano calo ilingi line balaculilapo nga nshi kabili insansa baba nasho shiba fye pa nshita iinono. Lelo, umulimo wesu ulapeela ifwe na bantu bambi insansa sha pe na pe. (1 Tim. 4:16) Ulafwa abantu ababa ne cishinka ukwishiba Yehova, ukwaluka umo balingile ukwaluka, no kukwata isubilo line line ilya mweo wa muyayaya. (Rom. 10:13-15) Nga tulebika sana mano ku mulimo wesu, tuleshiba icikalamba ico twabela pano calo, tulatemwa ukwishiba ukutila tulecita ico tulingile ukucita, kabili tulakwata isubilo lisuma ilya ku ntanshi.—1 Kor. 15:58.
3 Langeni Ukutila Mwalibika Amano ku Cuma Cenu: Ilingi line uko bengatwishibila ukuti twalibika amano ku cintu ni nshita e lyo ne fintu fimbi ifyo tupoosa pali ico cintu. Ala lishuko ukubomfya inshita yesu na maka ukulalumbanya Yehova! (Efes. 5:16, 17) Inshila tubomfeshamo inshita yesu ilingile ukulanga ukutila twacindika sana imilimo ya kwa Lesa ukucila imilimo yesu. Apo twalikwata icintu cimo icacindama nga nshi ico tulingile ukupeelako bambi, tukacincila ukubila imbila nsuma kabili ukucite co inshita ili yonse.
4 Ilingi line ifyuma fya mutengo tabafifisa iyo, lelo bafibika apo bambi bengalafimona. Nga ca kuti tulemona umulimo wesu uwa kubila nge cuma, ninshi lyonse e o tukalabikako sana mano. (Mat. 5:14-16) Shi tuletasha pa cuma ico twakwata, kabili lyonse tulepashanya umutumwa Paulo. Kabili, shi natulebomfya inshita yonse iyo tukwete ukulanga ukuti cine cine twalibika mano ku mulimo wesu, ukulaumona kwati cuma.