Bileni Konse Konse Ukupuulama kwa kwa Yehova
1. Cinshi cilenga tulebila ukupuulama kwa kwa Yehova?
1 “Fyenu, mwe Yehova, ubukulu na bumpalume no kuyemba no kupulama na bukatebebe, pantu conse icili mu muulu na pa nshi cenu.” (1 Imila. 29:11) Bushe ukutemwa twatemwa Yehova no mucinshi twamupeela fitulenga ukucita cinshi? Fitulenga ‘tulebila konse konse ukupuulama kwa watwitile ukuti tufume mu mfifi twingile mu lubuuto lwakwe ulwapesha amano.’ (1 Pet. 2:9) Te kuti tuleke ukweba bambi pa lwa kwa Lesa wesu umukalamba! Tukakwata ishuko ilisuma nga nshi ilya kubila ukupuulama kwa kwa Yehova mu myeshi ya March, April, na May.
2. Ni kampeni nshi iyaibela iyo bapekenye iya kusabankanya Icibukisho, kabili ni bani bengabombako?
2 Kampeni Yaibela iya Kusabankanya Icibukisho: Pali Cimo, pa April 2, tukalatontonkanya pa kupuulama kwa kwa Yehova ukupitila mu kusangwa ku Mulaalilo wa kwa Shikulu. Tukasabankanya isonde lyonse akapepala kaibela aka kwitilapo abantu ku Cibukisho ukutampa pa March 17 ukushinta pa April 2. Bonse tukabombeshe. Iyi kuti yaba ni nshita isuma iya kuti abapya bakatendeke ukusabankanya imbila nsuma nga bafikapo. Nga namukwata amasambililo ya Baibolo nelyo abana abengafikapo, landeni na baeluda.
3. Finshi nalimo twingalanda pa kwita abantu ku Cibukisho?
3 Iyi kampeni ikaba kwati ni ilya twacitile ilyo tatulaya ku Kulongana kwa Citungu ukwaleti “Ukulubuka Nakupalama!” Tukatumina ifilonganino fyonse utupepala twalinga ica kuti kasabankanya umo na umo akakwata utuli 8. Kuti mwalanda fye ifinono, nalimo ifyapala ifi: “Aka kapepala namupeela, ndemwita ku kulongana kwacindama uko tuli no kukwata ukubako fye umuku umo pa mwaka. Tukamupokelela bwino nga mwaisa. Inshita ne cifulo fyonse fili pali aka kene kapepala.” Lelo, umwine wa ng’anda nga nakwata amepusho, mwasukeni. Ifyebo fingamwafwa fyaba mu citabo ca Baibolo Isambilisha, pa mutwe uulanda pa Mulaalilo wa kwa Shikulu uwatendekela pe bula 206. Pa mpela ya milungu, tukalashalika bamagazini ba nomba line pamo na aka kapepala kaibela. Lembeni bonse abalefwaya ukusambilila kabili pekanyeni ukubwelelako.
4. Bushe tukasabankanya shani utupepala twaibela utwa kwitilapo abantu ku Cibukisho?
4 Konse uko cingalinga, aka kapepala kakwitilapo abantu ku Cibukisho tulingile ukupeela mwine ngˈanda mu minwe. E ico, lembeni amayanda yonse apashili abantu, kabili pekanyeni inshita imbi iya kubwelelamo. Ifilonganino ifikwete utupepala utwingi utushelepo kuti batendeka ukusha pa mayanda apashili abantu mu mulungu wa kulekelesha ilyo Icibukisho cishilafika. Tamulingile ukutendeka ukusha apashili abantu ilyo uyu mulungu wa kulekelesha taulafika. Mwilaba no kupeelako abo muya mu kupempula lyonse, abasambi benu aba Baibolo, balupwa lwenu, balya mubomba nabo, abena mupalamano benu na bambi fye abo mwaishibana na bo.
5. Mulandu nshi tulingile ukutendeka ukuipekanya ino nshita nga tulefwaya ukubombako bupainiya bwa kwafwilisha?
5 Bupainiya bwa Kwafwilisha: Bushe kuti mwabombesha ukubila ukupuulama kwa kwa Yehova mu March, April, na mu May ukupitila mu kubombako bupainiya bwa kwafwilisha? Pa kuti mubombeko mukakabila ukwalula ifintu fimo ifyo mucita cila bushiku. (Efes. 5:15-17) Kuti mwacetekela ukuti ukubombesha mu mulimo wa kwa Yehova kukamuletela insansa ne paalo lya kwa Yehova. (Amapi. 10:22) Apo inshita ya Cibukisho naipalama, ino e nshita ya kuti tutendeke ukuipekanya.—Amapi. 21:5.
6. Cinshi twingasambilila kuli nkashi uwa myaka 90 uwabombele bupainiya bwa kwafwilisha uyu mwaka wapwile?
6 Nkashi uuli ne myaka 90 ali-ipakishe umulimo wa bupainiya bwa kwafwilisha uyu mwaka wapwile. Atile: “Nangu ca kuti nalitemwa ukulima amaluba kabili nalefwaya ukutendeka ukubyala, nailwike ukutila nalekabila ukutantika bwino ifyo nacindamika. Apo nalefwaisha ukutangisha imilimo ya Bufumu, napingwilepo ukubomba bupainiya bwa kwafwilisha mu March.” Bushe uyu nkashi alipaalilwe pa kubombesha kwakwe? Atila, “Nalipalama sana ku cilonganino, kabili ici calilenga napalama sana kuli Yehova.” Bushe na ifwe kuti twaibebeta no kumona ifyo twabikako sana amano e lyo nga calinga na ifwe ukwalula ifyo twatantika inshita yesu?
7. Bushe calyafya ukubomba bupainiya bwa kwafwilisha?
7 Kuti limbi muletontonkanya ukuti kuti mwafilwa ukukumanya amaawala 50 ayafwaikwa mu mulimo wa bupainiya bwa kwafwilisha, lelo ukulanda fye icishinka te kuti kumukosele. Ilyo mulefwaya ukutantika bwino imilimo ya kubomba cila bushiku intanshi pepeni, tantikeni bwino, kabili bikenipo ne milimo ya Bufumu. Ni mwe mwaishiba bwino mwe bene. Nga ca kuti mulalwalilila kabili tamwakwata sana amaka, nalimo kuti mulebombako fye amaawala aya kupenda cila bushiku. Nga mulabomba nelyo mulaya ku sukulu, kuti mwabomba bupainiya bwa kwafwilisha nga mulebomba fye mu cungulo bushiku nangu pa mpela ya milungu.
8. Cinshi calengele abaupana babili ukubomba bupainiya bwa kwafwailisha?
8 Abengi balibomba bupainiya bwa kwafwilisha pamo no lupwa. Mu myaka ya ku numa, abaupana babili baleshimunuka ukulembesha bupainiya bwa kwafwilisha pa mulandu wa kuti balemona kwati incito balebomba teti ibasuminishe ukushako inshita ya kubomba uyu mulimo. Bushe bacitile shani pali ci? Batila: “Twapepele kuli Yehova ukuti atwafwe ukucita ico, pantu pa nshita iitali twalefwaya ukubombela pamo.” Pa numa ya kutantika bwino ifintu balifikile pa buyo bwabo. Na kabili batile: “Ala caliweme nga nshi. Twaipakishe amapaalo ayengi pamo. Kuti twatemwa ukukoselesha bambi ukutila, na bo besheko. Apo ifwe ngo lupwa twalibombele, na imwe kuti mwabomba.”
9. Cinshi mwingacita pe sambililo lya lupwa lwenu ilikonkelepo ku kupekanishisha iyi myeshi ileisa iya kubombesha kwaibela?
9 Pe sambililo lya lupwa ilikonkelepo kuti mwapaatulako inshita ya kulanshanya ifyo bonse mu lupwa mwingalundako imibombele yenu muli iyi myeshi ileisa. Nangu ca kutila te bonse mu lupwa bengabomba bupainiya bwa kwafwilisha, nalimo umo kuti abomba nga ca kuti bambi mu lupwa bamwafwa no kumutungilila. Nga ca kuti mu lupwa lwenu tamuli nangu umo uwingabomba bupainiya bwa kwafwilisha, ninshi limbi kuti mwapekanya ukulundako inshita mukabomba umulimo wa mwi bala muli iyi myeshi yaibela iya kubombesha.
10. Mulandu nshi tulingile ukwebelako bambi ukutila tulepanga ukubombako bupainiya bwa kwafwilisha muli iyi nshita ya Cibukisho?
10 Muleafwana: Ukucincila kulambukila. Shimikileniko bambi ukutila mulefwaya ukulembesha bupainiya bwa kwafwilisha. Ici kuti cacincisha na bambi ukulembesha bupainiya. Na kabili, ababombapo kale bupainiya kuti bamupandako na mano ayengamwafwa ukutantika bwino imilimo yenu ne nshita pa kuti mufike pa buyo bwenu. (Amapi. 15:22) Cimbi ico mwingacita nga ca kuti mulepanga ukubomba bupainiya bwa kwafwilisha ca kuti, nalimo kuti mwaeba kasabankanya umbi uuli ne mibele imo ine nge yenu ukutila na o alembesheko uyu mulimo.
11. Bushe baeluda kuti bacincisha shani bakasabankanya ukubomba bupainiya bwa kwafwilisha mu myeshi ileisa?
11 Baeluda abengi balapekanya bwino bwino ukubombako uyu mulimo waibela. (Heb. 13:7) Ici cilakosha sana icilonganino! Baeluda na kabili balalenga bambi ukucincila ukupitila mu kulanda nabo. Nalimo bambi icingalenga ukuti babombeko bupainiya bwa kwafwilisha mashiwi fye ayanono aya kukoselesha nelyo amashiwi ya kubapanda amano epela. Kangalila wa mulimo nalimo akatantika ukukumana kwa mulimo wa mwi bala na kumbi pa kutila bonse babombako ubunte bwe bumba, nangu fye ni pa numa ya kwinuka ku ncito nelyo ku sukulu. Uku kutantika bakalakubilisha lyonse. Na kabili akashininkisha ukutila bonse nabakwata icifulo calinga ica kubombelamo e lyo ne mpapulo.
12. Finshi mwingacita nga ca kuti te kuti mubombeko bupainiya bwa kwafwilisha?
12 Nangu ca kutila imibele te kuti imusuminishe ukubombako bupainiya bwa kwafwilisha, kuti mwakoselesha abalembeshe, kabili kuti mwabapepelako. (Amapi. 25:11; Kol. 4:12) Nalimo kuti mwatantika ukubomba nabo mu butumikishi ubushiku na bumbi mu kati ka mulungu nangu kuti mwalundako amaawala mushimikila.
13. Buyo nshi twimike muno Zambia, kabili icilonganino cenu kuti cayafwilisha shani ukufika pali ubu buyo?
13 Tulefwaya Bapainiya ba Kwafwilisha 15,000 mu April: Mu April 2000 e muku wa kubalilapo twakwete bapainiya ba kwafwilisha 10,724 mu Zambia, kabili ukufuma lilya tatwacilapo pali iyi mpendwa. E ico, tulefwaya tukakwate bapainiya ba kwafwilisha 15,000 mu April. Ici cipendo kuti twakumanisha nga ca kuti pali bakasabankanya 8 mu cilonganino cimo na cimo, umo alembesha umulimo wa bupainiya bwa kwafwilisha. Kwena, ifilonganino fimo mukaba bakasabankanya abengi ukucila na pa bo imibele ikasuminisha ukubombako bupainiya bwa kwafwilisha. Ubu buyo bwa cilonganino cimo na cimo, ifilonganino ifingi fikafikapo bwangu bwangu. Tontonkanyeni pa nsansa shikaba mu cilonganino e lyo ne fisuma fikafuma mu mulimo wa kubila mu cifulo cenu!
14. Mulandu nshi umweshi wa April ubelele bwino ukubombamo bupainiya bwa kwafwilisha?
14 Mulandu nshi umweshi wa April ubelele bwino ukubombamo bupainiya bwa kwafwilisha? Icibukisho cikaba ku kutampa kwa mweshi, kabili ici cikalenga tukabe ne nshiku ishingi isha kubwelela ku basangilweko. Tukalabomfya bamagazini mu mulimo wa mwi bala, kabili ubuyo bwesu bukaba kushalika icitabo ca Baibolo Isambilisha ilyo tulecita ifipempu fya kubwelelamo no kutendeka amasambililo ya Baibolo. E ico, ukubomba bupainiya bwa kwafwilisha mu April kukatupeela ishuko ilisuma ilya kutendeka amasambililo ya Baibolo. Na kabili, umweshi wa April ukwete inshiku sha Mulungu shisano no bushiku bwa mwikalwe bumo, kanshi ababomba na baya ku sukulu kuti balembeshako uyu mulimo.
15. Ilyo inshita ya Cibukisho ilepalama mulandu nshi tulingile ukubela abapamfiwa?
15 Cila mwaka, inshita ya Cibukisho (March-May) nga yapita ilatupalamika ku mpela ya buno bwikashi. Inshita isheleko iya kweba bambi pa lwa kwa Lesa wesu umukalamba, naicepa. (1 Kor. 7:29) Nga ca kuti iyi nshita ya Cibukisho yapita, ninshi capwa iyi nshita isuma iya kulumbanya Shifwe wa ku muulu naipita, tayakamoneke na kabili. E ico natupekanye ino ine nshita ukubombesha ukulingana na maka yesu mu March, mu April, na mu May ukubila ukupuulama kwa kwa Yehova!
[Akabokoshi pe bula 4]
Bushe Kuti Twakwata Bapainiya ba Kwafwilisha 15,000 mu April?
◼ Ibebeteni mumone ifyo mwabikako sana mano
◼ Lanshanyeni no lupwa ifyo mulepanga ukubomba
◼ Ebeniko bambi ifyo mulepanga