“Apeela Amaka ku Wapomponteka”
1 Ifwe bonse ilingi line tulanaka. Kuti twanaka pa mulandu wa ncito iyo tubomba nelyo ku milimo imbi, kabili amafya ayo tukwata muli ino ‘nshita yaafya,’ na yo kuti yatunasha. (2 Tim. 3:1) Apo tuli babomfi ba kwa Yehova, bushe kuti twacita shani nga tulefwaya ukukosa no kukanabwelela inuma mu mulimo wesu uwa kushimikila? Tufwile ukushintilila pali Yehova, uwaba na “maka ayengi.” (Esa. 40:26) Alishiba ifyo tukabila kabili alafwaya sana ukutwafwa.—1 Pet. 5:7.
2 Yehova Alipekanya Ifya Kutwafwa: Yehova alatwafwa ku umupashi wakwe uwa mushilo, amaka yashifilwa yalya yene abomfeshe pa kubumba ifintu. Umupashi wa kwa Lesa ulatulenga ‘ukupepemuka’ nga twapomponteka. (Esa. 40:31) Yipusheni amuti, ‘Bushe ni lilali nalekeleshe ukulomba umupashi wa mushilo ukuti unkoshe pa kuti ndebomba imilimo napeelwa iya Bwina Kristu?’—Luka 11:11-13.
3 Nga tulebelenga Icebo ca kwa Lesa icapuutwamo cila bushiku no kutontonkanya pa fyo tulebelenga, kabili lyonse nga tulebelenga impapulo shilanda pali Baibolo, tukaba “ngo muti uwalimbwa pa tumilonga twa menshi, uutwale fisabo fya uko mu nshita ya fiko, kabili amabuula ya uko tayalokota.”—Amalu. 1:2, 3.
4 Na kabili, Yehova alitupeela abasumina banensu, abaaba ‘ica kutukoselesha.’ (Kol. 4:10, 11) Ilyo tuli pa kulongana, balatukoselesha ku fyebo balanda ifya kutukuulilila, ifyo basukapo e lyo na malyashi bapeela. (Imil. 15:32) Baeluda sana sana balatukoselesha no kutukosha pa kuti tatulekele ukubombela Yehova.—Esa. 32:1, 2.
5 Ukushimikila: Nga mulepomponteka, te kwesha ukuleka ukushimikila! Ukushimikila, takwaba nge milimo imbi iyo tubomba, kwena kulatupembesula. (Mat. 11:28-30) Ukubila imbila nsuma kulatwafwa ukubika sana amano ku Bufumu bwa kwa Lesa no kulatontonkanya pa mapaalo ayasuma sana ayo bukaleta.
6 Kucili umulimo uukalamba uwa kubomba ilyo buno bwikashi bwabipa bushilaonaulwa. Tufwile ukutwalilila abashangila mu mulimo wesu uo tubomba pantu “ni ku bukose ubo Lesa apeela,” e ko tubombela. (1 Pet. 4:11) Yehova akatwafwa ukubomba umulimo wesu, pantu “apeela amaka ku wapomponteka.”—Esa. 40:29.